د نویو شمېرو پر بنسټ، د امریکا پوځي الوتکو په تېرو لسو میاشتو کې، څه باندې ۳ زره او ۵۰۰ بمونه د ترهګرو او طالبانو پر مورچلو غورځولي دي.
له بلخوا په افغانستان کې د ناټو او امریکايي ځواکونو قومندان جنرال جان نېکلسن وايي چې په سیمه کې د نشهيي توکو د ۲۰ مافیايي سازمانونو له ډلې ۱۳ یې په افغانستان کې فعال دي.
د دغه امریکايي جنرال په وینا، هغه ۴ سلنه نشهيي توکي چې په امریکا کې مصرفېږي، د افغانستان نشهيي توکي دي.
د «ان بي سي» شبکې د یو رپوټ له مخې امریکا د روان زیږدیز کال له پيله د اکتور میاشتې تر پایه د طالبانو په ګډون د دولت پرمخالفو وسله والو ۳ زرو او ۵۵۴ بمونه غورځولي دي .یعنې د تېر کال درې برابره او د وړم کال څلور برابره.
د طالبانو او نورو ترهګرو ډلو پر وړاندې د امریکا هوايي بریدونه
۲۰۱۷ ۳۵۵۴ بمونه
۲۰۱۶ ۱۳۳۷ بمونه
۲۰۱۵ ۹۴۷ بمونه
په افغانستان کې د ناټو او امریکايي ځواکونو قومندان جنرال جان نېکلسن څرګنده کړه:«موږ د طالبانو د مشرتابه تر منځ د اختلاف نښې وینو؛ هغوی پوهېږي چې نه شي بریالي کېدلای. په سپټمبر میاشت کې مو ولیدل چې طالبانو خپله کړنلاره بدله کړه، پرېکړه یې وکړه چې پر ښارونو د بریدو او د هغو د نیولو د هڅو پرځای ځانمرګي بریدونه وکړي.»
جنرال نکلسن اعلان وکړ چې تر دې وروسته به امریکایي ځواکونه د نشه یې توکو د فابریکې ویجاړې کړي. د ده په وینا دا کارخونې د طالبانو د عایدو اصلي سرچنه ده.
نوموړی همدا راز وايي چې د امریکا څلورسلنه هیرویین له افغانستانه ورځي.
هغه زیاته کړه:«په سیمه کې د نشهیې توکو شاوخوا شل سازمانونه شته ؛ له دې ډلې دیارلس سازمانونه په افغانستان کې دي او اوه سازمانونه یوازې په هلمند کې فعال دي.»
جنرال نکلسن وايي چې د طالبانو حضور پراخ شوی نه دی، خو د پروسږکال په څېر د پام وړ ولسوالۍ په خپل واک کې لري.
خو طالبان یوازې هغه ډله نه ده چې د امنیتي ځواکونه سږ کال ورسره په جګړه کې ښکېل دي.
اجرايي رییس عبدالله عبدالله په دې اړه وویل:«زموږ امنیتي ځواکونه د مهمو مرکزونو د نیولو لپاره په اغېزمنه توګه، د طالبانو، حقاني ډلې، د القاعدې، داعش او نورو پېژندل شویو ترهګرو ډلو هڅې په شا تمبوي.»
د امریکايي ځواکونو عمومي قومندان په افغانستان کې د نشهیې توکو د تولید زیاتوالي ته نغوته کوي او وايي چې د نشهیې توکو عواید د طالبانو د مشرانو ترمنځ د اختلافونو د زیاتېدو لامل شوی دی.