د ولسمشر د ویاند دفتر سرپرست، شاهحسین مرتضوي مني چې حکومت د ترهګریزو بریدونو په مخنیوي کې بریالی نه وو.
پر ۲۰۹ شاهین قول اردو له بریده درې ورځې تیریږي، خو تراوسه حکومت ددغې پيښې د مرګژوبلې شمېر نه په ډاګه کوي.
یو شمېر سرچېنې وايي چې پر ۲۰۹ شاهین قول اردو برید کې کابو دوه سوه سرتېري وژل شوي دي، خو ښاغلی مرتضوي په دې اړه څه نه وايي او یوازې زیاتوي:«دمسوؤل په توګه کله چې موږ د یوه کار په ترسره کولو کې ناتوانه ووسو، منو یې؛ خو د ترهګرو ځپلو په برخه کې زموږ لاسته راوړنې هم باید له پامه ونه غورځول شي.»
یو شمېر کارپوهان، په امنیتي بنسټونو کې د استخباراتو ناتواني لامل بولي چې حکومت نشي کولی د ترهګریزو پېښو مخه ونیسي.
دوی پر ۲۰۹ شاهین قول اردو برید د حکومت لپاره شرم بولي او وايي چې حکومت بیا هم د دې ډول بریدونو څخه څه نه زده کوي.
د سیاسي چارو کارپوه، اجمل بلوڅزاده واييک«د استخباراتو او ملي امنیت لخوا د امنیتي بنسټونو چاڼ کولی شي چې د دې ډول بریدونو مخنیوی وکرړي.»
ولسمشرۍ دفتر پر ۲۰۹ شاهین قول اردو په برید کې د افغان پوځیانو لاس لرل نه تایید او نه هم ردوي.
که څه هم خلک د پخوانیو پيښو د څیړنو له پایلو خوښ نه دي، خو ولسمشرۍ دفتر ټینګار کوي دا ځل باید د څیړنو پایلې د خلکو او ولسمشر لپاره د قناعت وړ وي.