د هېواد په کرېکټ بورد کې چارواکي وايي چې د لومړي ځل لپاره د افغانستان د کرېکټ د پنځو تنو غړو نومونه د هند د کرېکټ د غوره لیګ د پېرودنې په نوملړ کې راغلي دي.
په دغه نوملړ کې چې د هېواد د کرېکټ بورد او د هند د غوره لیګ سیالیو د ترسره کېدونکې کمېټې له خوا خپور شوی،دغه لیګ په پام کې لري چې د لېږد او رالېږد په بازار کې شهزاد محمدي او راشد ارمان د پنځه مېلیونه هندي کلدارو په ارزښت دغه لیګ ته جذب کړي.
په دغه نوملړ کې د شهزاد محمدي،راشد ارمان،اصغر ستانکزي،نبي عیسی خېل او دولت ځدران نومونه راغلي دي.
په دغه نوملړ کې د شهزاد محمدي او راشد ارمان نومونه د هغو لوبغاړو په کچه کې راغلي چې د پنځه مېلیونه هندي کلدارو په ارزښت پېرل کېږي.
د هېواد د غوره لوبغاړو اصغر ستانکزي،نبي عیسي خېل او دولت ځدران نومونه د هند د غوره لیګ د پېر په نوملړ کې شامل دي،خو تراوسه د دغو لوبغاړو د پېر بیه روښانه نه ده.
له بلخوا،هندي رسنۍ ادعا کوي چې د ممبي هندین لوبډله په پام کې لري چې شهزاد محمدي د خپلې لوبډلې د پیلوونکي او توپ نیوونکي په توګه جذب کړي.
د هېواد د کرېکټ بورد د رسنیو مسؤول فرید هوتک په دې اړه وویل:«د هند په غوره لیګ کې د افغان لوبغاړو لوبېدل د افغانستان لپاره یوه ستره لاسته راوړنه ده او د هېواد له ځوانو لوبغاړو سره د دغو لوبغاړو ګډون هغوی ته یو ځواک ورکوي ترڅو ډېره هڅه وکړي.»
هغه زیاته کړه:«د هېواد کرېکټ بورد هڅه کوي چې د نړۍ په غوره لیګونو کې د هېواد ملي لوبغاړو د ګډون لپاره زمینه برابره کړي.»
د کرېکټ بورد سلاکار عزیزالله فضلي هم په دې اړه وویل:«کهچېرې زموږ دوه یا درې لوبغاړي د هند د غوره لیګ له خوا وپېرل شي دا زموږ لپاره یو ستر ویاړ دی،او دا ځوانو لوبغاړو ته دا پیغام رسوي کهچېرې کوښښ وکړي کولای شي خپلو ټاکل شویو موخو ته ورسېږي.»