د بشري حقونو خپلواک کمېسیون او په افغانستان کې له بشري حقونو د دفاع بنسټونه په میرزا اولنګ کې د ولسي وګړو د قتل عام مسوول حکومت بولي.
دغه بنسټونه په میرزا اولنګ کې د قربانیانو د پاتې کسانو وضعیت د اندېښنې وړ بولي او دغو کورنیو ته د رسېدنې غوښتونکي دي.
له بشري حقونو د دفاع بنسټونه په میرزا اولنګ کې د ولسي وګړو وژل نسل وژنه او بشري جنایت بولي او د دغې پېښې د عاملانو د پېژندلو غوښتونکي دي.
د بشري حقونو د خپلواک کمېسیون ویاند بلال صدیقي وویل:«موږ د دولت له مخالفو وسلهوال څخه جداً غواړو چې ولسي وګړي په نښه نه کړي او له دې ډېر د جنګي جنایتونه ترسره نه کړي.»
د بشري حقونو دفاع بنسټونه د سر پل په میرزاولنګ دره کې د ماشومانو او میرمنو په ګډون د ملکي وګړو وژنه د نسلونو وژنه بولي.
د یادو بنسټونو غړي د جنايي جرمنو په وړاندې د نړیوالې محکمې څخه د دغې پېښې د څېړلو غوښتنه کوي.
له بشري حقونو د دفاع بنسټونو غړی نعیم نظري څرګنده کړه:«ترهګرۍ ډلې په ځانګړې توګه طالبان په پلان شوې توګه ځانګړې مذهبي او قومي ډلې په نښه کوي.»
د سرپل ولایت اوسېدونکی مرتضی صارم وايي:«ماشومان او ښځې ووژل شوې او په مرمۍ پرې واورېدې،بوډاګان هم ووژل شول.تراوسه یې مړي په میزا اولنګ کې پاتې دي، ځینې جنازې چې سرپل ته لېږدول شوې دي د یوه زیارت تهڅېرمه خښ شوي دي.»
دغه بنسټونه د طالبانو او داعشیانو له خوا د سرپل میرزا اولنګ دره کې ملکیان په ډزو وژل، هغوی له غره څخه راغورځول، په هېواد کې مذهبي او قومي نفاق اچول وبلل.
د مدني او بشري حقونو ټولنې غړی احمد شاه ستانکزی وايي:«په داسې حالت کې چې خلک قتل عام شوي دي ټول مسوولیت یې د دولت په غاړه دی.»
د دغو بنسټونو مسوولین وايي، سرپل ولایت ته د حکومت د لېږلي پلاوي لومړنۍ څېړنې ښيي، چې له دې پخوا د میرزااولنګ اوسېدونکو ته له شته ګواښونو حکومت خبر وو خو حکومت د خلکو د امنیت ټینګښت په اړه اقدام ونه کړ.
د مدني ټولنې د بنسټونو غړی ودود پدرام څرګنده کړه:«دا کار چا قصدي کړی؟ایا د قول اردو امنیتي چارواکو او یا هغه پولیس چې په مزار کې دي، یا هغې پرېکړې چې په ولسمشرۍ ماڼۍ او د امنیت په شورا کې شوې؟ولې دا ناورین له داسې پراخیې لمنې سره رامنځته شوې ده.»
د سر پل اوسېدونکو په خبره، په میرزااولنګ دره کې شاوخوا ۷۰۰ کورنیو ژوند کولو چې اوس ټولې بېځایه شوي دي.
دوی زیاتوي چې طالبانو او داعشیانو د میرزااولنګ بېځایه شوو کورنو ته اور ورته کړی دی.