د افغانستان د ۱۹ کلنو لوبغاړو د کرکټ لوبډله بنګلهدیش ته له ماتې ورکړې وروسته (د تلې۱۶مه) هېواد ته راستنه شوه.
افغان لوبډلې په پنځمه لوبه کې بریا خپله کړه او له دې سره یې له کوربه د اتلولۍ جام خپل کړ.
د کرکټ بورډ پراختیايي برخې مسوؤل، بشیر ستانکزی وايي:«د کرکټ نړیوالې شورا دایمي غړیتوب له ترلاسه کولو وروسته موږ نړیوالو ته ښکاره کړه چې دا زموږ حق وه او ومو کولی شول چې بنګلهدیش ته په خپل کور کې ماته ورکړو.»
د دې لوبدلې لوبډل مشر، نوینالحق زیاتوي:«موږ له بنګله دیش سره پنځه لوبې وکړې او درې مو وګټلې تر څو اسیایي لوبو ته ښه چمتوالی ولرو.»
د کرکټ لوبغاړی، درویش رسولي څرګندوي:«اوس چې د کرکټ نړیوالې شورا دایمي غړیتوب لرو، ښه لوبډله یوو او هڅه کوو چې آسیايي او نړیوالو لوبو کې هم ښه لاسته راوړنې ولرو.»
د افغانستان کرکټ بورډ وايي چې د هېواد د ۱۹ کلنو لوبغاړو لوبډله به له دمې وروسته د کرکټ نړیوالې شورا په چوکاټ کې کابل کې د هېواد حوزوي ټیمونو ترکیب په موخه څلور ورځنۍ ټسټ لوبې ترسره کړي.