د ترکیې ولسمشر رجب طیب اردوغان، نن چهارشنبې د اسلامي هېوادونو د همکاریو سازمان په شرمشریزه کې د نړۍ له هېوادونو وغوښتل چې بیت المقدس د فلسطین د پلازمېنې په توګه وپېژني.
هغه وویل چې امریکا باید د اسراییلو د پلازمېنې په توګه د بیتالمقدس د رسمي پېژندلو په اړه خپله پرېکړه بدله کړي.
ښاغلي اردوغان د ډونلډ ټرمپ دا اقدام د «ترهګرۍ د اقداماتو» لپاره یو مزد او لامل وباله او وې ویل چې د بیتالمقدس ښار د مسلمانانو لپاره سره کرښه ده.
هغه زیاته کړه چې د ټرمپ پرېکړه به نړۍ د کرکېچ په لور یوسي.
د ترکیې ولسمشر وویل چې اسراییل « یو ښکېلاک کوونکی او ترهګر دولت» دی.
هغه زیاته کړه:«بیتالمقدس د مسلمانانو لپاره حیاتي اهمیت لري. موږ باید له دې ډېر د ظلم او تېري په وړاندې چوپ پاتې نهشو.»
په دغې غونډه کې د فلسطین ولسمشر محمود عباس هم د ټرمپ پرېکړه د نړیوالو قوانینو پر خلاف یو اقدام وباله.
هغه وویل:«هېڅ هېواد نهشي کولای چې خپل سفارت بیتالمقدس ته ولېږدوي.»
ښاغلي عباس وویل چې نور د سولې په بهیر کې د امریکا ونډه نه مني. هغه څرګنده کړه. هغه زیاته کړه چې امریکا له دې وروسته د منځني ختیځ په سوله کې ونډه و نه لري.
د هغه په وینا، د امریکا متحده ایالات به د ټرمپ د اقدام له امله د نړۍ د هېوادونو په منځ کې خپل اعتبار له لاسه ورکړ.
د فلسطین ولسمشر وویل چې د اسراییلو د پلازمېنې په توګه د بیتالمقدس پېژندل «صهیونیست غورځنګ ته د ټرمپ ډالۍ» ده.
هغه په ډاګه کړه:«د فلسطین د پلازمېنې په توګه د بیتالمقدس د نه پاتې کېدو په صورت کې په منځني ختیځ کې به سوله او امنیت شونې نه وي.»
ولسمشر غني هم په دغې غونډه کې ګډون کړی دی.