په سوریه کې د روسيې پوځیانو قومندان، سرګي سوروویکن وایي امریکا له رقې ښار حالت له نېږدې څاري او له دې ښاره یې د داعش ډلې وتو لپاره مرسته کړې او ورته یې امن کږلیچ جوړ کړی دی.
سرګي سوروویکن زیاتوي:«موږ خبر شوي یوو چې داعش ډله د سوریې دیموکراتیکو ځواکونو پر وړاندې پرته له کوم مقاومت څخه رقه ښار یې پریښی او د پالمیرا خوا ته تللي دي.»
د روسیې د اردو دوه جګپوړي چارواکي پر امریکا تور پورې کړی چې امریکا له رقه ښار څخه د داعش په تیښته کې مرسته کړې او د بشارالاسد حکومت پر وړاندې له دغو جنګیالیو څخه کار اخیستی
نوموړی وړاندې وايي:«د نړیوال ائتلاف ځواکونو موخه د ترهګرو ډلو پر وړاندې مبارزه ده خو دوی د سوریې پر دولتي ځواکونو بریدونه کوي او اورپکي پرېږدي چې په ازادانه ډول په ښارونو کې وګرځي نو اوس اصلي پوښتنه دا ده چې د نړیوال ائتلاف ځواکونو موخه څه ده.»
دا روسي قومندان څرګندوي، داسې باور شته چې امریکایان د سوریې د دولتي ځواکونو د مخکې تګ مخنیوي لپاره له داعش ډلې څخه کار اخلي.
له بلې خوا دغه روسي چارواکي په سوریه کې د خپلو ځواکونو عملیات اغیزمن بللي.
دی وايي په تیره میاشت کې ۱۰۹ سیمې له جګړه مارانو څخه پاک شوي دي او په دې بهیر کې د روسیې جیټ الوتکې ۱۲۶۸ عملیاتي الوتنې ترسره کړي دي او د ترهګرو درې زره و دوه سوه قرارګاوې یې له منځه وړي دي