په موصل ښار کې د عراقي ځواکونو او داعش جنګیالیو ترمنځ سختې نښتې سره هممهال، زرګونه کسان اړ شوي چې له دې ښاره وتښتي.
عراقي ځواکونه النوري جومات ته چېرې چې داعش ډلې خپل خلافت اعلان کړی وه، نېږدي شوي دي.
د ویلو ده چې لا هم په دې ښار کې ۶۰۰ زره کسان بند پاتې دي، خو زرګونه تنه هم په تېښته بریالي شوي دي.
یوه بوډا د فرانسې خبري آژانس ته ویلي دي:«موږ ۲۵ ورځې بند پاتې وو. نه خواړه وو او نه اوبه. ټول د مړینې په حال کې دي او دوی باید موږ وژغوري.»
د عراقي ځواکونو یوه قومندان ویلي دي چې د موصل ښار تنګو کوڅو او د ملکي کسانو شتون له امله یې پوځي عملیات پڅ پر مخ روان دي، خو دوی اوسمهال توانیدلي تر څو له داعش ډلې څخه د لرغونې ښار بله برخه هم ونیسي.
د موصل زاړه ښار په سیمه کې جګړه سخته شوې ده او بهرني ائتلافي ځواکونه هم د عراقي ځواکونو ملاتړ کوي.
عراقي ځواکونو د ژمي په لومړیو کې د موصل ښار ختیځي سیمې ونیولې، خو لرغونې سیمې په دې ښار په لویدیځه برخه کې دي.
مخکې له دې عراقي ځواکونو له داعش ډلې مهمې سیمې لکه هوايي ډګر، د اورګاډي تمځای او دولتي ودانۍ نیولې وې.