د فرانسې ولسمشر ایمانویل مکرون وايي هغه توغندی چې څو ورځې وړاندې له یمن څخه د سعودي عربستان د پلازمېنې په لور توغول شوی وه، یو ایراني توغندی وه.
د مکرون په باور، د یمن حوثيانو د ایران په ملاتړ دغه توغندی د ریاض ښار د ملک خالد پر هوايي ډګر توغولی دی.
د فرانسې ولسمشر له دغه برید څخه ورسته، سعودي عربستان ته ولاړ. هغه عربستان ته له رسېدو وړاندې د دوبۍ په ښار کې وویل:«هغه توغندی چې له یمن څخه ویشتل شوی او د سعودي عربستان له خوا شنډ شو، یو ایراني توغندی دی، دا د هغوی د توغندويي فعالیت ځواک ښيي.»
له دې ټولو سره د فرانسې ولسمشر له ایران سره د توغندويي پروګرام خبرو اترو او همدارنګه له لوېدیځ سره د دغه هېواد د اټومي هوکړې پر ساتلو ټینګار کوي.
هغه څرګنده کړه:«موږ اړتیا لرو چې له ایران سره اټومي هوکړه وساتو؛ ځکه کهچېرې له دغې هوکړې څخه لیرې شو دا کار، له ځنډه پرته پر جګړې او یا هم له کنټرول څخه د اوضاع د بهر کېدو لامل به شي، او له ناچارۍ څخه به وضعیت د شمالي کوریا په څېر شي چې نه شو کولای هغه ومنو.»
دا په داسې حال کې ده چې له دې وړاندې ریاض هم ایران د دغه توغندي پر توغولو کې پړ بللی وه او ویلي یې دي چې د ایران دا کار د سعودي عربستان په وړاندې د جګړه ده.