پرېکنده ملاتړ ماموریت په افغانستان کې د یوه بهرني سرتېري له وژل کېدو خبر ورکوي خو په دې اړه ډېر جزییات نه وړاندې کوي.
د پرېکنده ملاتړ ماموریت د پېښې د کره سیمې او د پېښې د څرنګوالي په اړه جزییات نه دي ورکړي.
د پرېکنده ملاتړ ماموریت په خپرپاڼه کې راغلي دي چې وژل شوی سرتېری امریکايي وکړی دی.
دا لسم امریکايي سرتېری دی چې د روان کال په لړ کې افغانستان کې وژل کېږي. په ۲۰۱۸ زیږدیز کال کې بیا ۱۲ سرتېري وژل شوي وو.
د امریکا د دفاع وزارت شمېرې ښيي چې له ۲۰۰۱ز کال راهیسې تراوسه په افغانستان کې دوه زره او ۳۰۰ تنه امریکايي سرتېري وژل شوي او څه باندې ۲۰ زره او ۴۰۰ تنه نور ټپيان شوي دي.