د ماشومانو د حقونو د ملاتړ قانون نن یکشنبه (د غوايي په ۱۵مه) د ولسمشر اشرف غني د دویم مرستیال سرور دانش له لوري معرفي شو.
د وګړیتوب حق، د پېژاند او نسب حق، د زېږون د نېټې ثبت حق، د مور له شېدو سره د تغذیې حق، له ماشومانو څخه د ګټې اخیستو مخنیوی، د ماشومانو د ځورونې مخنیوی، د دیني او مذهبي لږکیو د ماشومانو د حقونو لرل، چوپړتیاو ته د لاسرسي حق، له قرباني ماشومانو ملاتړ، د ښوونې او روزنې زمینې برابرول هغه برخې دي چې دغه قانون جوړوي.
دغه قانون چې شپاړس فصلونه او ۱۰۸ مادې لري د ولسمشر په تقنیني فرمان سره اجرايي شوی، هغه هم په داسې وضعیت کې چې د حکومت د شمېرو له مخې ۴۴ سلنه ماشومان ښوونځي ته له تلو بې برخې دي، د ولسمشر دویم مرستیال وايي په ۲۰۱۷ زیږدیز کال کې هېواد کې په هرو درېیو ساعتونو کې یوه ماشوم ژوند له لاسه ورکاوه او ۲۰۱۸ز کال بیا د افغان ماشومانو لپاره تر پخوا خونړی کال و.
په دغه قانون کې له ماشومانو د ملاتړ حقوقي چوکاټ برابر شوی، د دې قانون پر بنسټ هغه کسان چې د اتلس کلنۍ عمر یې نه وي پوره کړی ماشوم بلل کېږي.
دا قانون د سن د ټاکلو د څرنګوالي او د ماشوم د تعریف پر سر اختلاف له امله څه باندې دوه کاله په ملي شورا کې پاتې شو خو کومه پایله یې نه لرله.
د ولسمشر دویم مرستیال وايي چې افغانستان د هغو هېوادونو په لومړي سر کې ځای لري چې ماشومان په هغه کې د جګړې قرباني دي. هغه زیاتوي چې طالبانو باید له دې ډېر نور جګړې ته دوام ور نه کړي.
دمګړۍ هېواد کې څه باندې درې مېلیونه او اته سوه زره ماشومان مرستې ته اړتیا لري.
په افغانستان کې دا قانون د ماشومانو د حقونو لپاره د ملګروملتو سازمان له کنوانسیونه دېرش کاله وروسته جوړ شوی دی. د ملګروملتو سازمان له ماشومانو د ملاتړ صندوق مسوولین وايي په افغانستان کې ماشومان ستونزمن وضعیت لري.