په داسې حال کې چې ولسمشرۍ ماڼۍ او ډېری سیاستوال، په دوحه کې د افغانانو ترمنځ غونډې هرکلی کوي، خو د حزب اسلامي مشر ګلبدین حکمتیار پر دغې غونډې نیوکه کوي.
د حزب اسلامي مشر، له هغه څه چې د سولې په خبرو اترو کې د بهرنیو لاسوهنه ګڼي اندېښمن دی او وايي چې حکومت د هغو کسانو په غوراوي کې چې دوحې ته تللي هېڅ واک نهدی لرلی او د دغې غونډې له اجنډا هم خبر نهلري.
ښاغلي حکمتیار چې نن (یکشنبې د چنګاښ ۱۶مه) کابل په یوې ناسته کې وینا کوله،ټينګار وکړ چې تراوسه د سولې خبرې اترې، هېڅ مشخصه اجنډا نهلري:«بهرنیان غواړي چې دا مهمه ملي پېښه په خپل انحصار کې کړي، او دا د افغانانو ترمنځ خبرې اترې چې په قطر کې دوام لري د افغانانو ترمنځ یو څرګند مثال دی؛ افغانان غواړي خو حکومت خبر نهلري، ولسمشر خبر نهلري.»
نوموړی ټینګار کوي تراوسه د دوحې ناستې په هکله له سیاستوالانو سره مشوره نه ده شوې او بهرنیان هڅه کوي چې د سولې خبرې په واک کې ولري.
له بلخوا د سولې عالي شورا وايي د دوحې ناسته نوې هیله ده چې د سولې خبرو پایلې ته له رسېدو سره به مرسته وکړي.
د سولې د عالي شورا مرستیال عبدالحق حقیار څرګنده کړه:«د افغانستان د خلکو لپاره د خبرو یوه دروازه پرانیستل شوې، دا چې د طالبانو او امریکایانو ترمنځ غونډې روانې دي موږ له هغې دومره خوښ نه وو. هیلې همدا وې چې هغوی په خپله، د ځان د ګټې لپاره استفاده کوله؛ خو اوس موږ هیلهمن یوو دا چې مشران وايي خوشبینه نه دي مخکې هم پاکستان ته تللي وو، فکر نه کوم چې ناستې به یې کومه پایله لرلي وي.»
له دې مخکې د ولسمشر ویاند صدیق صدیقي هم ویلي و کهڅه هم د دوحې غونډې ګډون کوونکي د حکومت استازيتوب نه کوي، خو دا غونډه د سولې په بهیر کې یو پرمختګ دی.
د حزب اسلامي مشر د خپلې وینا په بله برخه کې پر تذکرو د سټیکرونو لګول په ټاکنو کې د درغلۍ لپاره د زمینې برابرول ګڼي اووايي ټاکنیز کمېسیونونه باید په ټولو ټاکنیزو بهیرونو کې له ټکنالوژۍ کار واخلي او کډوالو او کورنیو بې ځایه شویو ته هم باید په ټاکنو کې د ګډون زمینه برابره کړي.
د حزب اسلامي مشر ګلبدین حکمتیار څرګنده کړه:«موږ د دې غوښتونکي یوو چې ولسمشرۍ ټاکنې رڼې او عادلانه وي؛ په هغې کې د ټاکنو کمېسیون له خوا درغلۍ ونهشي، په دې شرط چې خپلواکي یې تضمین شي. بهرني ځواکونه به دې کې لاسوهنه ونه کړي او د ولسمشرۍ ټاکنو د نوماندانو تر بشپړې څارنې لاندې ترسره شي.»
ګلبدین حکمتیار وايي په ولسمشرۍ ټاکنو کې له ګډونه د کډوالو د بې برخې کولو په اړه د حکومت او ټاکنیزو کمېسیونونو تصمیم یوه سیاسي پرېکړه ده.