د عامې روغتیا وزارت وايي چې په ټول هېواد کې ۴۰ زره تنه د سرطان په ځانګړې توګه د سینې پر سرطان اخته دي.
د دغه وزارت چارواکي، څرګندوي چې یوازې په ۲۰۱۸ز کال کې څه باندې ۳ زره ښځې د سینې پر سرطان اخته وې چې ۱۷۰۰ ته یې مړې شوې.
د عامې روغتیا وزارت په همدې موخه نن (یکشنبې د غبرګولي په ۲۶ مه) د سینې سرطان له ناروغۍ سره د مبارزې د پوهاوي لومړنی پړاو د ۳۴ ولایتونو د ډاکټرانو له حضور سره کابل کې پيل کړ.
مایان چې له یوولسو کلونو راهیسې د سینې له سرطانه کړېږي. هغه چې اوس د کابل په جمهوریت روغتون کې بستر ده وايي په تېرو کلونو کې مجبوره وه د درملنې لپاره له هېواده بهر ولاړه شي خو اوس په هېواد کې تر یوه بریده د دغه راز ناروغیو د درملنې اسانتیا برابره شوې ده.
هغه وايي:«څو ځله پاکستان ته ولاړم، ما ته یې درمل راکړل او هغه سرطاني تومور مې چې درلود ډېر غټ و اوس کوچنی شوی دی.»
شیلا بله مېرمن ده چې هغه هم د سينې پر سرطان اخته ده، هغې وویل:«د جمهوریت روغتون ته راغلم او درملنه مې وشوه. له ډاکټرانو څخه مو پوښتنه وکړه چې تومور باسئ؟ وې ویل چې نه سینه پرې کوو.»
په جمهوریت روغتون کې د سرطاني ناروغیو د تشخیص او درملنې لومړنی مرکز څلور کاله مخکې جوړ شوی دی.
دا مرکز د ۶۵ بسترونو په لرلو د زیات شمېر ناروغانو د درملنې ظرفیت نه لري.
ډاکتر عبدالمنان داوري:«ښځو ته دا وایم چې خپله سینه په خپله معاینه کړي؛ هر میاشت یوځل معاینه کړي کهچېرې کومه غده او کلک څیز وي زموږ مرکز دې مراجعه وکړي چې درملنه یې وشي.»
د عامې روغتیا وزارت د شمېرو له مخې په اوسني وخت کې له دیرش تر څلویښت زره کسان په هېواد کې په سرطان ناروغۍ اخته دي. په ۲۰۱۸ کال کې په نړۍ کې د سرطاني ناروغانو شمېر اتلس مېلیون تنه بلل شوی چې له هغې جملې لس مېلیونه یې ساه ورکړې ده.
په دې اړه مو اندونه