د جوزجان ولایت پولیس وايي طالبانو په دې ولایت کې یو ښوونکی وژلی او اووه قومي مشران یې له ځانه سره بېولي دي.
پېښه تېره ورځ(شنبې د تلې په ۲۱مه نېټه) د فیض آباد ولسوالۍ په علي آباد کې کې شوې ده.
د جوزجان د امنیه قومندانۍ د امنیت آمر، جنرال کمال الدین یاور وايي طالبانو د فیض آباد ولسوالۍ د یوه ښوونځي سرمعلم، علاوالدین له موټره ښکته کړی او وژلی دی.
ښاغلی یاور زیاتوي چې علاوالدین د جوزجان په فیض آباد ولسوالۍ کې د سیمه ییزو پاڅونکوونکو قوندان، خان ضابط ورور دی.
د جوزجان د امنیت آمر زیاتوي چې طالبانو اووه تنه قومي مشران هم له ځانه سره بېولي او لا یې برخلیک څرګند نه دی.
طالبانو په دې اړه څه نه دي ویلي.