د سمنګانو پولیس د دوشنبې په ورځ (د لیندۍ په ۱۲ مه) وايي چې طالبانو هغه ۴۵ تښتول شوي موټر چلوونکي ازاد کړي چې تېره ورځ یې د دغه ولایت په دره صوف پایان ولسوالۍ کې تښتولي وو.
د سمنګانو د امنیه قومندانۍ ویاند محمد منیر رحیمي وايي چې دغه چلوونکي تېره شپه د طالبانو له خوا ازاد کړل شوي دي.
هغه زیاتوي چې د موټرو د تګ راتګ لپاره لاره پرانیستې ده او ټاکل شوې چې ډېر ژر په دغې سیمه کې یوه امنیتي پوسته زیاته کړل شي.
په ورته وخت کې د سمنګانو د ولایتي شورا رییس رازمحمد وايي چې دغه چلوونکي د پیسو په بدل کې ازاد کړل شوي دي.
هغه همدارنګه وايي طالبانو له چلوونکو غوښتي چې له دې وروسته باید هغوی ته د هر موټر پیسې ورکړل شي.
خو د سمنګانو د امنیه قومندانۍ ویاند ویلي چې طالبانو د دې لپاره دا کار کړی ترڅو چلوونکي د مالیې ورکړې ته اړ کړي.
په دغې لاره تر ډېره باروړونکي موټر تګ را تګ کوي چې د دره صوف د ډبرو سکرو له کانونو سکاره د هېواد بازارونو ته لېږدوي او ویل کېږي چې نیول شوي کسان د مزارشریف په لور روان وو.
خو طالبانو تراوسه په دې اړه څه نه دي ویلي.
تېره اوونۍ هم طالبانو ۲۵ کسان چې د سرپل ولایت له بلخاب ولسوالۍ څخه د مزارشریف په لورې روان وو د دغه ولایت له کشندې ولسوالۍ کې تښتولي او تراوسه یې برخلیک مالوم نه دی.