اجراییه رییس عبدالله عبدالله د سیمهييزې حکومتولۍ په اړه غوڼده کې د حکومت په پرېکړو کې د سیمهيیزو ادارو د مسوولینو پر لازیاتې ونډې ټینګار وکړ.
د هېواد د ناامنو او نیمه ناامنو ولایتونو د ۲۵۰ ولسوالانو په ګډون د ستونزو د هواري او حکومتولۍ د ښهوالي په اړه د حل لارو د موندلو لپاره یاده غونډه جوړه شوې وه.
عبدالله عبدالله وویل: «د افغانستان د بودجې وړاندوینه دې له ولسوالیو ولایت ته وشي وروسته بیا مرکز کې همغږي وشي او هغه بودجه دې د محل په واک کې ورکړل شي.»
د سیمهییزو ارګانونو رییس عبدالمتین بیګ هم څرګنده کړه، چې هڅه کوي یوه کړنلار رامنځته کړي: «له دې کنفرانس سره زموږ هڅه دا ده، چې د ولسوالیو د پياوړتیا په ځانګړې توګه پر درېیم واحد د ولسوالیو د اغېزمنتیا او د ولسوال د ونډې د تعریف لپاره یوه کړنلاره رامنځته کړو.»
د اداري اصلاحاتو او ملکي خدمتونو خپلواک کمېسیون رییس د سیمهيیزو ادارو د کارکونکو شمېر د ولایتونو د وګړو د شمېر په پرتله کم بولي.\
د نوموړي په باور له دې وروسته به ولسوالان د دوی د مشرۍ وړتیاوو ته په پام سره وګمارل شي.
د اداري اصلاحاتو او ملکي خدمتونو خپلواک کمېسیون رییس نادر نادري وویل: «هغه انساني او بشري تناسب چې د ولسوالیو او ولایتونو په کچه شته د دستګاوو له تشکیلاتو سره برابر نه دی باید برابر یې کړو.»
خو په دې اړه ځينې ولسوالان بدل نظر او خپل وړاندیزونه لري.
د بدخشان د راغستان ولسوال غلام الله سعید وویل: «زموږ سپارښتنه دا ده، چې د اعلان وړ دویم بستونه چې د دویم ریاست او ولسوالانو لپاره دي تر منځ تفکیک او توپير وشي.»
د کندهار د معروف ولسوال عبدالغني مسلمیار بیا د نا امنۍ اندېښنه څرګندوي: «معروف ولسوالۍ یا ارغستان ولسوالۍ سرحدي او غرنۍ ولسوالۍ دي امنیت يې ورځ تر بلې خرابېږي.»
ټاکل شوې د سیمهيیزې حکومتولۍ په اړه دا بحث به سبا ورځ هم دوام ولري.