د قزاقستان د دفاع او فضايي صنعت وزیر تېره ورځ (دوشنبې د لړم په ۸ مه)د هېواد له اجرائيه رییس عبدالله عبدالله سره په لیدنه کې وویل چې هېواد یې د سوداګرۍ، پر انرژۍ د ګډ کار، د اوسپنې پټلۍ د غځولو او جوړولو، پوځي او امنیتي برخو کې له افغانستان سره به همکاري وکړي.
هغه زیاتوي چې له افغانستان سره په پوځي برخه کې، فضايي انځور اخیستنې او سایبري امنیت په برخه کې به د همکارۍ تړونونه ډېر ژر لاسلیک شي.
په ورته وخت کې عبدالله د سیمې هېوادونو په وړاندې ګواښونه د دغو هېوادونو اصلي ننګونې بولي او د دغو ننګونو د مخنیوي لپاره د دغه دوه هېوادونو پر دفاعي او امنیتي همکاریو ټینګار کوي.