په داسې حال کې چې امریکا متحده ایالات د سولې خبرو اترو مېز ته د طالبانو د راکاږلو هڅې کوي، بدخشان ولایت کې دیني عالمان د سول د بهیر د چټکوالي غوښتنه کوي او له طالبانو غواړي چې له افغان حکومت سره مخامخ خبرې وکړي.
یادو دیني عالمانو پنجشنبې(د مرغومې ۲۷مه) فیض آباد ښار کې سره غونډه وکړه.
د بدخشان د علماو شورا مرستیال، مولوي حفیظ الله وايي:«د مسلمانانو به منځ کې اصلاح د خدای امر دی؛ آیا تاسې(طالبان) د خدای امر منئ او که نه؟»
همداراز د بدخشان ولایت د حج او اقافو رییس، نورالحق نوري په دې ناسته کې سوله د اسلامي زده کړې د پیاوړې کېدو لامل بولي.
دی زیاتوي:«پرمختګ، پراختیا، عدالت، انصاف او انډولتیا په یوه هېواد کې پر سولې او امنیت پورې تړاو لري. هغه ملتونه چې سوله نلري، ډوډۍ نلري، دین نلري.»
په همدې حال کې د بدخشان ولایت خلک هم له طالبانو دا غوښتنه لري. دوی وايي چې له جګړې ستړي شوي دي.
دوی طالبانو ته وايي چې وسلې پر ځمکه کېږدي او د سولې بهیر او د هېواد پرمحتګ لپاره کار وکړي