د افغانستان لپاره د ملګرو ملتونو ځانګړي استازي تدامیچي نن سېشنبې (د لیندۍ په ۱۴ مه) وویل چې په افغانستان کې یې د جګړې له ښکېلو لوریو سره د اړیکې نیولو هڅه پیل کړې او موخه یې هم په جګړه کې د ولسي وګړي مرګ ژوبلې ته د پای ټکي اېښودل دي.
افغانستان کې د ملګرو ملتونو ځانګړی استازی وایي د ملګرو ملتونو سازمان هڅه کوي په جګړه کې ښکېل لوري د سولې خبرو ته کېنوي.
په ورته وخت کې د افغانستان د بشري حقونو خپلواک کمېسیون، د ولسي وګړو د مرګ وژبلې د زیاتوالي له کبله اندېښمن دی.
د ملګرو ملتونو سازمان د شمېرو له مخکې یوازې د روان لمریز کال په لومړیو شپږو میاشتو کې یو زر او ۶۰۰ تنه ملکي وګړي په جګړو کې وژل شوي دي.
د افغانستان لپاره د ملګرو ملتونو ځانګړي استازي تدامیچي یاماماتو څرګنده کړه:«ملګري ملتونه د ملکي وګړو د ژوند خوندیتوب لپاره د جګړې له ټولو ښکېلو غاړو سره د اړیکې لپاره خپلو هڅو ته دوام ورکوي او ټولې ښکېلې غاړې سولې ته وهڅوي.»
ملګري ملتونه په راتلونکو پارلماني او د ولسوالیو شوراګانو په ټاکنو کې د مېرمنو په پراخې ونډې ټينګار کوي.
ښاغلي تدامیچي زیاته کړه:« غواړم ډاډ ورکړم چې ملګري ملتونه به په ټول توان سره هڅې وکړي ترڅو ډاډ ترسره کړي چې مېرمنې په ټاکنو کې د رایي ورکونکو، کمپاینرانو، او د ټاکنیزو نوماندانو په څېر ګډون وکړي د هغوی ګډون به ډېرمهم وي.»
خو د افغانستان په جګړه کې د ولسي وګړو د مرګ ژوبلې د اندېښنې ترڅنګ د ماشومانو ښکېل کېدل جنګي جرمنونه ګڼل کېږي.
د بشري حقونو د خپلواک کمېسیون مشره سیما سمر وايي:«د سیمهییزو پولیسو په منځ کې له ماشومانو څخه استفاده کېږي او هیله لرو چې دغه کار ودرول شي.»
خو د کورنیو چارو وزارت په نېږدې راتلونکي کې د پولیسو د کړنلارو خبر ورکوي.
د کورنیو چارو وزیر ویس احمد برمک څرګنده کړه:«هغه تورونه چې په تېر کې پورې وو چې ګواکې ماشومان د سیمهییزو پولیسو په چوکات کې شته، دا ستونزه په نښه شوې خو تراوسه هم موږ نه شو کولای چې په بشپړه توګه دغه ستونزه رد کړو.»
د افغان جګړې یوه پایله چې په دغې غونډه کې د یوې جدي اندېښنې په توګه ور څخه یادونه کېږي د کورنیو بېځایه شویو زیاتوالی دی.
د بشري حقونو د خپلواک کمېسیون د مالوماتو له مخې په تېرکال کې ۲۰۰ زره کسان د کورنیو جګړو په پایله کې بېځایه شوي دي.