د امریکا ولسمشر ډونلډ ټرمپ، د جمعې په ورځ (د زمري په ۱۱مه) په یو خبري ناسته کې د افغانستان په اړه خپلې جنجال زېږنده څرګندونې تکرار کړې او وې ویل کهچېرې غوښتي وای، کولای شول په دوه، درې او یا هم څلورو ورځو کې افغانستان کې بریا ترلاسه کړي؛ خو نه غواړي چې لس مېلیونه تنه ووژني.
هغه زیاته کړه کهچېرې داسې شوي وای، نو ډېری بې ګناه کسان به وژل شوي وای.
هغه څرګنده کړه چې د افغان سولې له خبرو اترو سره هممهاله ډېر پرمختګونه شوي او امریکا به په دغه هېواد کې خپل ځواکونه کم کړي.
له دې مخکې هم ټرمپ څو اوونۍ مخکې د پاکستان له لومړي وزیر عمران خان سره په لیدنه کې همدا ډول څرګندونې کړې وې چې د افغانانو له سخت مخالفت سره مخامخ شوې وې.