د ملي شورا یو شمېر غړو نن(یکشنبې د وږي پر ۲۶مه) په خپله ناسته کې د ملي یووالي حکومت د مشرانو او یو شمېر چارواکو ترمنځ د اختلافونو له کموالي هرکلی کوي او هغه د هېواد په ګټه بولي.
خو یو شمېر نور بیا دا اختلافونه او دوستۍ د سیاستوالو د شخصي ګډو له کبله بولي.
د مشرانو جرګې غړی، نثار حارث وايي:«لکه څنګه چې ولسمشر ویلي وو په وروستیو ورځو کې د یو شمېر سیاسي منتقدینو سره خبرو اترو ته د ننه شو چې دا به له خیره خالي نه وي.»
همداراز بله غړې، ګلالۍ نور صافۍ زیاتوي:«زه د ولسمشر او اجرائیه رئیس او سیاسي مشرانو له صبر او حوصلې مننه کوم هیله ده چې په راتلونکو ورځو کې د دې شاهد ووسو چې له جنرال صاحب دوستم سره هم اړیکې ښې شي.»
په همدې حال کې د مشرانو جرګې غړي د حکومتي چارواکو پر همغږۍ ټینګار کوي، خو وايي چې د دوی اړیکې د شخصي ګټو پر اساس دي.
صفيالله هاشمي وايي:«هیله ده چې دا د ملي ګټو لپاره وي نه د شخصي ګټو لپاره.»
بل غړی، میربتخان منګل څرګندوي:«تر هغې ځایه چې زه ګورم اتیا سلنه یې د شخصي ګټو لپاره کوي نه د ټولنیزو او عامه ګټو لپاره.»
خو د مشرانو جرګې رئیس د سیمهييزو او د مرکزي حکومت چارواکو ترمنځ ستونز رامنځته کېدو کې دواړو خواوې ګرمې بولي.
همداراز د مشرانو جرګې رئیس، فضلالهادي مسلمیار داسې نظر نلري:«له شکه پرته چې مرکزې او سیمهييز چارواکي خپلې ستونزې لري.»
وروسته له ډېرې مودې د بهرنیو چارو وزارت سرپرست، صلاحالدین رباني او ولسمشر ترمنځ تر لیريوالي وروسته اوسمهال دواړه د ملګرو ملتونو په عمومي ناسته کې ګډون کوي او ترڅنګ یې د اجرائیه رئیس، عبدالله عبدالله او د بلخ والي عطامحمد نور ترمنځ هم د دوشنبې پر ورځ لیدنه وه چې وشوه.