د هېواد د معاصر روژنالیزم پلار د محمود طرزي اثر «سه قطعه روی زمین» کتاب له یوې پېړۍ وروسته د ترکیې لخوا د بیا ځلې لپاره چاپېږي.
دا د سلو کلونو پخواني لیکونه دي چې د افغانستان او ترکیې د سیاسي او کلتوري اړیکو ښودنه کوي او د محمود طرزي او د عثماني دولت ترمنځ یو بل ته لېږل شوې دي.
د دغه کتاب مخکتنه، نن (یکشنبې، د وري په ۲۵ مه) هرات کې وشوه. له دې سره هممهاله د محمود طرزي د هڅو او لاسته راوړنو نندارتون هم پرانیستل شو.
افغانستان کې د ترکیې د انکشافي دفتر (تیکا) چارواکي وايي چې محمود طرزي د افغانستان او ترکیې ترمنځ د اړیکو پراختیا کې مهمه ونډه لرلې او له همدې امله، دغه بنسټ د هغه خاطرې ژوندۍ ساتي.
په اسیا کې د ترکیې د تیکا دفتر رییس علي اوزګون په دې اړه څرګنده کړه:«محمود طرزي داسې کس و چې د افغانستان او ترکیې ترمنځ یې د دوستانه اړیکو د پياوړتیا په برخه کې هم رول لوبولای دی.د دې لپاره چې افغانان د محمود طرزي کارونه له یاده و نه باسي، موږ وغوښتل د هغه کتاب چې کابو سل کاله مخکې چاپ شوی، بیا چاپ او د افغانستان راتلوونکي نسل ته یې معرفي کړو»
د محمود طرزي دا کتاب د ځینو اروپايي، افریقايي او اسیايي هېوادونو له څېړونکو سره چې هغه ور ته سفرونه کړي مرسته کوي چې له دې هېوادونو سره د افغانستان اړیکې په سمه توګه وارزوي.
دا سندونه ښيي چې د افغانستان او ترکیې سیاسي او کلتوري اړیکې اوږده مخینه لري او سیاسي او کلتوري وضعیت یې پر یو بل اغېزه کړې ده.
د محمود طرزي په دې کتاب کې د هغه د سفرونو خاطرات لیکل شوي. همدا ډول دا لیکونه د محمود طرزي او د عثماني دولت د مشرانو ترمنځ یو بل ته لېږل شوي دي.
دا لومړی ځل دی چې د محمود طرزي دا کتاب په نوې بڼه چاپېږي. په دغه کتاب کې د محمود طرزي خاطرې، سفرونه راغلي دي.