دمالیي وزارت د خصوصي اودولتي برخو د ګډې پانګونې لپاره د ۱۸۹ بیلابیلو پروژو د نوملړ له جوړیدو خبر ورکوي، د یاد وزارت چارواکي وایي چې له دغې ډلې ۴۶یې د کرنې،بریښنا تولید او صنایعو په برخه کې دي چې لومړيتوب ورکړی شوی دی.
د عامي او خصوصي مشارکت رئیس، عبدالمومن منصور وايي:«په دې یو نیم کال کې مو پنځه پروژې د قرارداد تر پړاو ورسولې او دا پروژې اخیستل شوې دي چې د لومړني پانګونې ارزښت یې ۳۲۸ میلیونو ډالرو ته رسیږي.»
د عامه او خصوصي مشارکت د طرحې له مخې چې مخ پر ودې هېوادونو لپاره د پانګې د جذب غوره تجربه ګڼل کېږي، حکومت او خصوصي سکټور په ګډه، هېوادونو کې د پانګونې د ودې لپاره زمینه سازي کوي.
په همدې حال د سوداګرۍ او صنایعو خونه که څه هم د دولت او خصوصي سکټور ګډه پانګونه د هېواد په ګټه بولي، خو وايي په دې برخه کې لا زیاتې اسانتیاوې برابرې شي.
د سوداګرۍ خونو ویاند، صیام پسرلی زیاتوي:«د عامه او خصوصي مشارکت قانون یو ښه قانون دی، خو د پلې کولو لپاره یې باید چې بستر جوړونه وشي او باور جوړونه وشي. شته ستونزې د امنیت نشتوالی، اداري فساد دی چې باید ورسره مبارزه وشي. امنیت تامین شي چې د دې قانون له مخې افغانستان کې پانګونه وکړو.»
که څه هم د دولت او خصوصي سکټور د ګډې پانګونې د طرحې کارونه د افغانستان نویو تجربو کې شمېرل کېږي، خو د مالیې وزارت وايي، تر اوسه په دا ډول پنځو ګډو پروژو افغانستان کې له درې سوه ملیونه ډالرو زیاته پانګونه شوې ده.