د کورنیو چارو وزارت وايي چې ټاکل شوې ده سر له سبا، څه باندې ۵۰ زره امنیتي ځواکونه د ولسي جرګې د ټاکنو د امنیت ټینګښت لپاره خپله دنده پیل کړي.
ټاکل شوې ده چې د ولسي جرګې ټاکنې، تر راتلونکو اوو ورځو (د تلې په ۲۸ مه) د رایې ورکړې په څه باندې پنځه زره مرکزونو کې ترسره شي.
په دې لړ کې د کورنیو چارو وزارت په وینا، د هېواد په ۱۹ بېلابېلو ولسوالیو کې د رایې ورکړې مرکزونه له لوړ امنیتي ګواښ سره مخ دي.
د کورنیو چارو وزارت ویاند نجیب دانش په دې اړه وویل:«د ټاکنو د ورځې د امنیت تامین لپاره، موږ څه باندې ۵۰ زره ځواکونه په پام کې نیولي، خو د اړتیا په صورت کې دا ځواکونه تغییر کوي.»
په همدې حال کې د ولسي جرګې ټاکنو پر وړاندې د امنیتي ننګونو له اندېښې سره د ټاکنو خپلواک کمېسیون له امنیتي ادارو غواړي څو د راتلونکو ټاکنو امنیت ټینګښت لپاره خپل تدابیر زیات کړي.
د ټاکنو خپلواک کمېسیون منشي حفیظ الله هاشمي:«په تېر درې میاشتو کې په پنځو زرو مرکزونو کې نوملیکنه شوې ده او امنیتي ځواکونو د دغو مرکزونو د امنیت ټينګښت تایید کړی، خو کهچېرې د امنیت په تامین کې بدلون رامنځته شي، ښه ده چې امنیتي بنسټونه هغه له موږ سره شریک کړي.»
دا په داسې حال کې ده چې د ټاکنیزو سیالیو له پيله، تراوسه په هېواد کې څو ترهګریزې پېښې رامنځته شوې دي چې د ځينو نوماندانو په ګډون یو شمېر هېوادول یې هم وژلي دي.
دغه وضعیت پر ټاکنو څارونکي بنسټونه هم اندېښمن کړي. دغه بنسټونه وايي کهچېرې دغه امنیتي ګواښونه حل نه شي، نه یوازې په ټاکنو کې روڼتیا نه تضمینېږي، بلکې د رایې ورکوونکو او نوماندانو ژوند هم په خطر کې دی.
له دې سره جوخت، د ټاکنو کمېسیون وايي چې بنسټیز ټاکنیز توکي له کابل او میدان وردګو پرته د ۳۱ ولایتونو مرکزونو ته رسېدلي دي، او ټاکل شوې ده د ټاکنو له ترسراوي یوه ورځ مخکې دغه توکي د رایې ورکولو مرکزونو ته ورسېږي.
بلخوا دغه کمېسیون وايي چې تراوسه ټول هغه کارکوونکي چې د ټاکنو په ورځ د بایومېټریک له دستګاوو استفاده کوي، هغوی ته د دغو دستګاوو د استفادې د څرنګوالي روزنه ورکړل شي.