پر ټاکنو څارونکي بنسټونه وايي چې په بدخشان کې د ټاکنو خپلواک کمېسیون سیمه‎ییز دفتر رییس سید روح‎الله موسوي، څه باندې یوه میاشت کېږي چې له هېواده بهر ته تللی او تراوسه نه دی راستون شوی.
دغه بنسټونه، که‎څه هم پر هغه د فساد تورونو په اړه څه نه وايي، خو بدخشان کې د ولسي جرګې د ټاکنو ځينې نوماندان ادعا لري چې ښاغلی موسوي د ټاکنو کمېسیون د ځینو کارکوونکو حقوق هم له ځان سره وړي دي. 
په هغه لیک کې چې د طلوع نیوز لاسته ورغلی د دې ښودنه کوي چې سید روح الله موسوي له ټاکنو کمېسیونه غوښتي چې د مرغومې میاشتې له لومړۍ تر شلمې نېټې رخصت ورکړي. خو، اوس چې د سلواغې ۵ مه نېټه ده هغه هېواد ته راستون شوی نه دی.
په بدخشان کې د ټاکنو څارونکي بنسټونه او نوماندان وايي، ښاغلی موسوي بېرته دندې ته نه دي راګرځېدلی او تښتېدلی دی.
د فیفا ویانده مروه امیني وايي:«دوی وویل چې رخصت یې اخیستی، خو له هغه وخت تېر شو، خو کمېسیون په دې اړه هېڅ ځواب ویوونکی نه و او بدخشان کې د ټاکنو مسوول سربېره د کندوز د ټاکنو د مسوول په اړه هم خبر نشته.»
د ټاکنو خپلواک کمېسیون بیا وايي، د بدخشان د ټاکنو کمېسیون مسوول رخصت اخیستی، مګر دوی یې اوس په اړه معلومات نه لري.
د ټاکنو خپلواک کمېسیون مرستیال عبدالعزیز ابراهیمي څرګنده کړه:« په دې اړه به موږ خپلې څېړنې وکړو چې ښاغلی موسوي چېرته دی او په کوم کار بوخت دی.»
بل لورته بیا د بدخشان د ټاکنو کمېسیون ولایتي کارکوونکي وايي، څو میاشتې کېږي چې خپل معاش یې نه دی اخیستی.
د بدخشان د ټاکنو کمېسیون کارکوونکی ذبیح الله  په ډاګه کړه:«لس میاشتې کېږي چې د پروژې له ختمه وروسته دلته کمېسیون ته راځو او تراوسه زموږ د کارکوونکو پیسې نه دي ورکړل شوي.»
د بدخشان د ټاکنو کمېسیون سرپرست غلام جان انوري څرګنده کړه:«پیسې نه دي راغلي؛ دا پیسې د «یو ان ډي پي» له لارې ورکول کېږي. یو ان ډي پي وايي هر کله چې په خپله شخص وي او هویت یې تثبیت شي، پیسې ویشي.»
له دې وړاندې د کندوز د ټاکنو کمېسیون د ولایتي مسوول په اړه هم راپورونه خپاره شوې وو چې دنده یې پرېښې، خو برخلیک یې معلوم نه دی.
لویه څارنوالي بیا وايي، د کندوز د ټاکنو کمېسیون د ولایتي مسوول په اړه څېړنه کوي.
د لویې څارنوالۍ د شمېرو له مخې، په ۱۹ ولایتونو کې یې د ټاکنو کمېسیون د ۲۲ کارکوونکو په ګډون ۲۳۲ د ټاکنیزو جرمونو په تور نیولي دي.