د ولسمشر اشرف غني دویم مرستیال سروردانش وايي چې د ټاکنیزو کمېسیونونو نوي غړي باید د کوندونو، مدني ټولنو او ولسمشرۍ ټاکنو نوماندانو اعتماد ته درناوی وکړي. او د راتلوونکو ټاکنو روڼتیا ته ژمن او ځواب ویونکي وي.
ښاغلي دانش چې د شنبې په ورځ (د کب پر ۱۱ مه) د څېړنې د عالي ادارې د رییس د معرفۍ په مراسمو کې وینا کوله وویل:«موږ هیله لرو هغه کسان چې د دغو کمېسیونونو دغړو په توګه ګومارل کېږي، پر هغه اعتماد چې حکومت، سیاسي ګوندونو، مدني ټولنې او ولسمشرۍ ټاکنو ته نوماندانو کړی درناوی وکړي او د ډموکراسۍ له خوندیتوب، د خلکو رایو، د قانون پلي کولو او د ټاکنو روڼتیا ته ژمن او ځواب ویونکي وي.»
د جمعې په ورځ، ولسمشرۍ ټاکنو ته نوماندانو په ټاکنیزو کمېسیونونو کې د غړیتوب لپاره نوماندانو ته رایه ورکړه چې د ۸۱ نوماندانو له ډلې ۱۶ تنو لوړې رایې(له ۶ تر ۹ رایې) ترلاسه کړې دي.
ټاکل شوې ده چې ولسمشر غني د ۱۶ تنو له ډلې ۱۴ تنه د ټاکنیزو کمېسیونونو د غړو په توګه وګوماري.
درې اوونۍ مخکې، د ټاکنو په قانون کې له تعدیل وروسته ولسمشر د ټاکنیزو کمېسیونونو رییسان او غړي له دندو لیرې او لویې څارنوالۍ ته معرفي کړل. د ټاکنیزو کمېسیونونو پخواني غړي په مالي فساد او له خپلو واکونو په ناوړه استفادې تورن دي.
ټاکل شوې ده چې ولسمشرۍ ټاکنې د راتلوونکي کال د چنګاښ په ۲۹مه ترسره شي. ولسمشرۍ ماڼۍ وايي چې د ټاکنیزو کمېسیونونو د غړو له بدلون سره به د ټاکنو د ترسراوي په مهالوېش کې بدلون رامنځته نه شي.