په روسیه کې د ۲۰۱۸ فوټبال نړیوال جام د سیالیو په دوام کې د تېره ورځ(سې شنبې د غبرګولي ۲۹مه) درې لوبې وشوې، لومړنۍ لوبه د جاپان او کلمبیا د لوبډلو ترمنځ وه چې په پایله کې جاپان ۲ د یو په وړاندې کلمبیا ته ماتې ورکړه.
دویمه لوبه چې ماښام ۰۷:۳۰ پیل شوه د سنګال او پولنډ لوبډلو ترمنځ وه او په دې لوبه کې سنګال ۲ د ۱ له پولنډ څخه لوبه وګټله.
او په درېمه لوبه کې چې وروستۍ ترسره شوه د کوربه ټیم روسیې ۳ د ۱ په وړاندې له مصر څخه بریال خپله کړه.
ټاکل شوې ده چې د دغو سیالیو په دوام کې نن هم درې نورې لوبې ترسره کېږي چې لومړۍ به یې د پرتګال او مراکش، دویمه د یورګوای او عربستان او درېیمه به د ایران او اسپانیا ترمنځ وي.