د ملي یووالي حکومت د هوکړې د عملي کېدو کمېسیون مشر محمد ناطقي په ولسمشرۍ ماڼۍ کې د واک پر تمرکز له نیوکې سره وايي چې ولسمشر په اساسي قانون کې د یوه سلطان په توګه له ډېر ځواک څخه برخمن دی او دا قانون باید تعدیل شي.
اجرايي ریاست هم د اساسي قانون پر تعدیل، او د لویې جرګې پر جوړېد او د نظام پر بدلون ټینګار کوي.
د ملي یووالي حکومت د هوکړې د عملي کولو د کمېسیون رییس د اساسي قانون د تصویب د څوارلسمې کلیزې په مراسمو کې واک د ارګ په انحصار کې ګڼي او وايي په ریاستي نظام کې د ولسمشر صلاحیتونه له اندازې زیات دي.
ښاغلي ناطقي په دې اړه زیاته کړه:«د قانون ۶۰ – ۷۷ مادې د ولسمشر د واکونو په اړه دي او د ولسمشر واکونه فوق العاده زیات دي د یوه سلطان او کله هم له هغه زیات. په سیاسي او اقتصادي، امنیتي او ټولو برخو کې ولسمشر ډېر واکونه ورکړل شوي دي.»
ښاغلی ناطقي وايي کهڅه هم د ملي یووالي حکومت د موافقې له مخې د کابینې د پرېکړو اجرا کېدل د اجراییه ریاست واک دی خو دا ریاست د حکومت په اجرايي کارونو کې هېڅ رول نهلري.
محمد ناطقي دا ستونزه د اجراییه ریاست د بې پامۍ له امله هم بولي.
ناطقي زیاته کړه:«هوکړهلیک اجرايي ریاست ته اجرايي واکونه ورکړي ترڅو په ټولو بنسټونو کې اجرايي واک ولري خو بر عکس دی او اجرايي ریاست هېڅ صلاحیت نهلري او اجرايي واکونه له ولسمشرۍ ماڼۍ سره دي.»
د عبدالله عبدالله ویاند د اجراییه ریاست د واک شریکان د ژمنو په ماتولو تورنوي او د نظام پر بدلون ټینګار کوي.
د عبدالله ویاند مجیب الرحمان رحیمي څرګنده کړه:«اجراییه ریاست د نظام پر بدلون، د قانون په تعدیل د سیاسي هوکړې پر پلي کېدو او د واک نه متمرکز کېدو ته ژمن دی.»
قانون پوهان هم وايي چې د اساسي قانون څه د پاسه ۱۰۰ مادې تعدیل ته اړتیا لري او د دغه قانون د کارولو دوام په هېواد کې د ستونزو د زیاتېد لامل ګڼي.
قانون پوه عین الدین بهادري په دې اړه وايي:«د اساسي قانون د تعدیل لپاره دلایل شته د دغه قانون باید څه باندې ۱۰۰ مادې تعدیل شي.»
د غونډې برخوال د اساسي قانون د مثبتو اړخونو یادونه هم کوي خو وايي په دې قانون کې د قدرت تمرکز لویه ستونزه ده.