پلازمینې کابل یوشمیر اوسیدونکي د بریښنا میترونو له بدلولو شکایت لري، دوی وايي چې د بریښنا شرکت سیمهييز مسوولین د دې له امله چې له پخوانیو میترونو کې فساد کوي، نو ځکه نه غواړی میترونه یې بدل کړي.
له «انالوګ څخه دیجیتال» ته په پلازمینه کابل کې د بریښنا ميټرونو بدلولو بهیر له لسو کلو راهیسې دوام لري، خو لاهم یو شمېر اوسیدونکي نه دي توانیدلي چې خپل میټر بدل کړي.
د کابل اوسيدونکي، نوید وویل:«په یو شمېر مواردو کې د برېښنا شرکت یو شمېر کارکوونکي له کورنیو سره جوړه کوي او لګښت یې کم شمېري. ځکه دا کسان د دیجیتالي میترونو لګولو لپاره خوښ نه دي.»
د پلازمینې دغه اوسیدونکي وایي، د میترونو د لوستو پرمهال د بریښنا شرکت د کار کوونکو لخوا له ګڼو ستونزو سره مخ دي.
د هغوی په وینا د بریښنا شرکت نه شي کولی د بریښنا عواید په سمه توګه راټول کړي.
د کابل بل اوسېدونکی، محمد قسیم زیاتوي:«د برېښنا شرکت باید زموږ مېترونه دیجیتال کړي، ځکه چې موږ نه پوهېږو څومره د دوی حساب د برېښنا په صرفیه کې رېښتینی دی.»
په همدې حال کې د بریښنا شرکت مسوولین وایي چې د کابل بریښنا په شبکه کې دستونزو د هوارۍ په موخه به ډېر ژره میترونه بدل شي.
د برېښنا شرکت ویاند، وحیدالله توحیدي څرګندوي:«موږ د ټولو ډیجیتالي میترونو لګولو په موخه کارونه پیل کړي دي او د اکار په چټکۍ روان دی.»
د بریښنا شرکت په پام کې لري د خپلو عوایدو شفاف راټولولو په برخه کې د بریښنا بیلونه د بریښنا په شبکه کې نصب کړي.