د کونړ والي، واحدالله کلیمزي نن(یکشنبې د کب۱۵مه) وویل چې د دې ولایت پر یو شمېر سیمو د پاکستاني پوځیانو د راکټي بریدونو یوازې په تېرو دوو اوونۍو کې یوه ښځه او درې ماشومان وژل شوي دي.
ښاغلی کلیمزی زیاتوي چې مرکزي حکومت باید د دې روښانه تیري مخه ونیسي.
نوموړي زیاته کړه:«یوازې په تېرو دوو اوونیو کې د پاکستانیانو د راکټي بریدونو کې څلور ملکي کسان چې یوه ښځه او درې ماشومان په کې شامل دي وژل شوي دي.»
نازیان، لعلپور، ګوشته، خاص کونړ، سرکاڼو او دانګام د هېواد هغه سیمې دي چې تر ډېره پرې پاکستاني پوځيان راکټي بریدونه کوي.
که څه هم کابل د پاکستاني پوځيانو د راکټي بریدونو د مخنیوي لپاره د هڅو ډاډ ورکوي، خو تر اوسه دې هڅو پایله نه درلوده.
له بلې خوا، دفاع وزارت د هېواد پر ختیځو سیمو د پاکستاني پوځیانو راکټي بریدونه د منلو وړ نه بولي.
د یاد وزارت ویاند، دولت وزیري وویل:«که دا بریدونه دوام وکړي نو افغان وسلهوال پوځ او د خلک د دې زغم نلري چې دا به د پاکستان لپاره ښه نه وي.»
دا په داسې حال کې ده چې د بهرنیو چارو وزارت په دې برخه کې له طلوعنیوز سره له خبرو ډډه وکړه، خو اوسوخت کې د پاکستاني پوځ راکټي بریدونو مخنیوي لپاره سیاسي حللاره غوره بلل کېږي.
د هېواد په ختیځ کې پولهساتو ځواکونو قومندان، محمدایوب حسینخېل څرګندوي:«دا پاکستاني پوځيان د ډپلوماټیکو اوصولو خلاف کړنې کوي او دا د یوه ګاونډي لپاره ښه کار نه دی، تاسو پوهېږئ چې پوځیان په صفري سیمه کې ځای پر ځای شوي دي، خو زموږ ځواکونه نه غواړي چې د اوصولو خلاف عمل وکړي.»
د شمېرو له مخې پاکستاني پوځيانو یوازې په تېرو دوو اوونیو کې پر کونړ ولایت ۵۰۰ توغندي توغولي دي او چې له امله یې د هېواد په ختیځ کې ۵۰۰ کورنۍ بېځایه شوي دي.