د لوګر د والي او د دې ولایت د امنیت د رییس پر موټریز کاروان برید کې اتو تنو ژوند له لاسه ورکړی دی چې په کې د والي ساتونکي او پولیس شامل دي.
امنیتي چارواکي نن(یکشنبې د مرغومې په ۳۰مه نېټه) وايي په برید کې والي او د امنیت رییس ته زیان نه دی رسېدلی.
د یاد ولایت د امنیه قومندانۍ ویاند، شاه پور احمدزی برید تاییدوي او وايي له غرمې مخکې کابو لس نیمې بجې د والي او د امنیت رییس پر موتریز کاروان چې د له کابل نه د راتګ په حال کې وو برید شوی دی.
امنیتي چارواکي وايي دا برید د لوګر د محمد آغې ولسوالۍ په «سنګ سفید» سیمه کې شوی.
دی وايي چې بریدګر په موټر کې ځای پر ځای شوي چاودېدونکي توکي د والي د موټریز کاروان سره نېږدې چوولی دی.
په پېښه کې یو شمېر کسان ټپیان دي چې د کره شمېر په اړه یې څه نه دي ویل شوي.
د برید مسوولیت طالبانو منلی.