د هلمند ولایت په لښکرګاه ښار کې د ماین چاودنې له کبله یو سیمهییز خبریال ټپي شو.
سیمه ییز خبریال، نثار احمد احمدي نن(سېشنبې د کب په ۲۱مه نېټه) هغه مهال ټپي شوی چې پر موټر یې چسپکي ماین نښلول شوی وو.
د هلمند ولایت سیمهییز چارواکي وايي د ښاغلي احمدي پښې ټپي شوې دي او اوسمهال په ایمرجنسي روغتون کې تر درملنې لاندې دی.
چارواکي د ښاغلي احمدي حالت ښه بولي.
چارواکي وايي پېښه نن سهار هغه مهال شوې چې ښاغلي احمدي په یوه کلب کې له سپورټ کولو وروسته غوښتل د خپل کاري دفتر پر لور لاړ شي چې ماین پرې چاودلی دی.
د پېښې مسوولیت کومې ډلې نه دی منلی.