د هلمند ولایت د رسنیو دفتر وايي چې طالب جنګیالیو د جمعې ورځې (د کب په ۱۰ مه) د سهار درې بجو په شاوخوا کې له څو خواوو د شوراب پر اډې برید وکړ چې دې ځای کې ۲۱۵ میوند قول اردو هم موقعیت لري.
دا برید، د شپې ناوخته له دوه بجو وروسته پیل او تراوسه (۶ بجو) پورې یې دوام درلود.
خو د دغې خبرپاڼې پربنسټ، په دغه برید کې دواړو لورو ته مرګ ژوبله اوښتې ده خو کره شمېر یې مالوم نه دی. او دمګړۍ په سیمه کې چاڼیز عملیات روان دي.
خو یوه امنیتي سرچینه طلوع نیوز ته وايي چې په دغ برید کې د میوند قول اردو د ګارنیزیون قومندان په ګډون ۲۵ تنه وژل شوي دي او د جګړې د دوام دا دی چې ځینې بریدګر هاموې موټرو ته ننوتلي دي.
د ملي دفاع وزارت د سرپرست په توګه د اسدالله خالد د کار له پيل وروسته دا په یوه برید کې د ملي پوځ تر ټولو ستره مرګ ژوبله ده چې ورسېږي.
ملي دفاع وزارت د بریدګرو شمېر دولس تنه ښيي او په دغه برید کې د مرګ ژوبلې په اړه څه نه وايي، خو زیاتوي چې دا یو پېچلی ترهګریز برید و.
د طالبانو دا برید په داسې حال کې د هېواد په سوېل کې پر یوې مهمې پوځي اډې ترسره کېږي چې د ارمریکا استازي له طالبانو سره په دوحه کې د سولې پر خبرو ترو بوخت دي.
اخوا طالبانو ادعا کوي، چې په دغه برید کې دولتي ځواکونو ته ډېره مرګ ژوبله اوښتې ده. خو رسمي سرچینې دا ادعا نه مني.