د افغانستان لپاره د روسیې ځانګړی استازی، ضمیر کابلوف وايي، مسکو تمه لري تر څو امریکايي چارواکي په قطر کې د طالبانو او امریکا ترمنځ د سولې خبرو اترو په تړاو د خبرو جزئیات ورسره شریک کړي.
ښاغلی کابلوف د روسیې تاس خبري آژانس سره په خبرو کې ویلي چې (چهارشنبې د کب په ۲۹مه نېټه) به واشنګټن ته په دوه ورځني سفر ولاړ شي او ډاډه دی چې امریکايي چارواکي به له طالبانو سره د خبرو اترو د پرمختګ په اړه جزییات ورسره شریک کړي.
هغه څرګنده کړې ده:«زه به واشنګټن ته ولاړ شم او ډاډه یم او تمه لرم چې دا کار(د خبرو په اړه د جزییاتو ورکړه) به وشي.»
د روسیې ځانګړي استازي وړاندې ویلي دي واشنګټن ته یې د سفر موخه هم د جزئیاتو ترلاسه کول دي.
کابلوف ویلي دي:«زموږ ناسته په (واشنګټن) کې د همدې موضوع په موخه ده.»
امریکا متحده ایالاتو او طالبانو تر اوسه قطر کې پنځه ځله د سولې په تړاو ناستې کړې دي، خو جزئیات یې نه دي خپاره کړي دي.