د ملي امنیت پخواني رییس اسدالله خالد په مشرۍ د «حرکت امید سبا» په نامه یوه نوي سیاسي بهیر د پنجشنبې په ورځ (د زمري په ۱۱ مه) د موجودیت اعلان وکړ.
اسدالله خالد په هغې غونډه کې چې په همدې منظور جوړه شوې وه په خپله وینا کې حکومت په کم کارۍ تورن وي او وايي چې د کړکېچ د حل لپاره پروګرام نه لري.
د هغه په باور، افغانستان اوس په کړکېچ کې واقع دی او حکومت د هغه د حل لپاره نه یوازې پروګرام نه لري بلکې د قانون له ماتولو سره د هغه له زیاتوالي سره مرسته کوي.
ښاغلی خالد وايي د دې حکومت په رامنځته کېدو سره ملي یووالی له خطر سره مخامخ شوی، امنیت لاخراب او سیاسي ثبات ته زیان رسېدلی دی.
هغه همدارنګه د ټاکنو په ترسراوي ټینګار وکړ او وې ویل چې خلک د رڼو او عادلانه ټاکنو ترسراوي غوښتونکي دي.
د حرکت امید سبا سیاسي بهیر مشر اسدالله خالد څرګنده کړه:«څوک باور کوي چې ۹ مېلیونه تنو د ټاکنو لپاره نوملیکنه کړې ده؟ حکمتیار صاحب په دې وروستیو کې وویل چې یوازې ۲ مېلیون تنو په واقعي توګه نوملیکنه کړې، خو زه په دغو دوو مېلیونو هم شک لرم.»
د حرکت امید سبا سیاسي بهیر مشر په راتلونکو ټاکنو کې د احتمالي درغلیو په اړه د اندېښنې په څرګندولو سره د رڼو او عادلانه ټاکنو په ترسره کولو ټینګار کوي او وايي د مهندسۍ مخه به ونیسي.
ښاغلي خالد د ملي یووالي حکومت له مشرانو غواړي چې په هېواد کې د قومي شخړو مخ دې ونیسي.
د ملي امنیت پخوانی رییس په افغانستان کې د امنیتي وضعیت په اړه هم اندېښنه څرګندوي. هغه وویل چې ورځ په ورځ هېواد کې ناامني زیاتېږي.
هغه څرګنده کړه:« له بده مرغه ورځ په ورځ امنیتي وضعیت خرابېږي او حکومت د امنیت د ښهوالي لپاره هېڅ پروګرام نه لري.»
دا سیاسي جریان په داسې حال کې رامنځته کېږي چې له دې مخکې د «د افغانستان ستر ملي ایتلاف» په نامه هم د هغه څه لپاره چې په ټاکنو کې د درغلۍ او د د کړکېچ په لور د هېواد تګ مخنیوی بلل کېږي د موجودیت اعلان وکړ.
کهڅه هم په دغه ایتلاف کې مطرح سیاسي او جهادي څېرې لکه جنرال دوستم، عطامحمد نور او محقق شامل دي، خو د حرکت امید سبا په دې باور دي چې دا ډول ایتلافونه او همدارنګه سیاسي بهیرونه نه شي کولای د افغانستان د کړکېچ په حل کې مرسته وکړي. ځکه چې د هغوی په وینا ولسي ملاتړ نه لري.
د دغه بهیر مشر چې په خپله د سولې قرباني دی، په هېواد کې د سولې ټینګښت خپله موخه بولي او د سولې د ټینګښت لپاره له ټولو هڅو ملاتړ کوي.
ښاغلی خالد څو کاله مخکې په یوه ځانمرګي برید کې ټپي شو، ځانمرګي بریدګر د سولې د پيغام راوړونکي په نوم ځان هغه ته ورساوه.
خو ولسمشرۍ دفتر د ښاغلي خالد لخوا د حکومت د مشرانو د تورنولو په غبرګون کې وايي د ملي یووالي حکومت معیار اساسي قانون دی او د حکومت هڅې د اساسي قانون پلي کول دي.