ولسي جرګې د نن ورځې په عمومي ناسته کې پر حکومت د قانونماتونې له امله سختې نیوکې وکړې او د هغو وزارتونو لپاره چې سرپرستانو لخوا اداره کېږي، د نوماند وزیرانو د معرفي غوښتنه وکړه.
سره له دې چې کابو لس وزارتونه د سرپرستانو لخوا اداره کېږي، خو په دې اړه د حکومت چوپتیا ولسي جرګه په غصه کړې او وايي چې دوی له میاشتو راهیسې د نوماند وزیرانو د معرفي غوښتنه کړې ده.
د ولسي جرګې رئیس، عبدالروؤف ابراهیمي داسې نظر لري:«د اداري اجراتو قاون خلاف یو شمېر سرپرستان په کابینه کې لري. د سترې محکمې درېیو غړو د خدمت دوره هم پای ته رسېدلې ده چې اوسمهال د سرپرست په توګه دنده ترسره کوي او هم د سرې میاشتې رئیس یو کال کېږي چې لا هم سرپرته ده، دا د قانون خلاف کار دی.»
د ولسي جرګې غړې، فوزیه کوفي څرګندوي:«نه پوهېږم ولې د هغه قانون نقض کې مرسته وکړو چې خپله مو تصویب کړی دی؛ دا موضوع ولي آجنډا کې نه شاملیږي، زما وړاندیز دا دی چې مخکې له رخصتیو د وزیرانو د رایو موضوع وروستۍ کړو.»
د حکومت له عمر څخه د نېږدې درېیو کلونو په تېرېدو سره لا هم یې کابینه نه ده بشپړه شوې، او په همدې حال کې د ولسمشرۍ دوهم مرستیال، سرور دانش د لوړو زدهکړو وزارت لپاره نن(شنبې د چنګاښ۱۷مه)سرپرست معرفي کړ.
سرور دانش په دې مراسمو کې وویل:«علمي چاپېریال د قضا چاپيریال په ډول دی، ډېر سپيڅلی دی چې باید ناپییلی او بې پرې ووسي او د حکومت او سیاسي مداخلو لیري وي.»
مخکې له دې حکومت څلور تنه نوماند وزیران ولسي جرګې ته وروپېژندل، د جرګې لخوا رد شول.
سره له دې د ولسي جرګې رخصتیانې تر دوو ورځو پورې پيلیږي، که حکومت په دې موده کې وزیران معرفي نکړي نو دا کار به څو راتلونکو میاشتو پورې وځنډیږي.