بریټانیا، په افغانستان کې د لرغونو او کلتوري اثارو د خوندي ساتلو په لړ کې د دغه هېواد پر ملاتړ ټینګار کوي.
کابل کې د بریټانیا سفیر د ملي موزیم د لیدو پر مهال وویل چې لندن تل هڅه کړې ترڅو له بېلابېلو لارو په افغانستان کې له موزمونو او حکومتونو ملاتړ وکړي.
نیکولاس کي، د شنبې په ورځ (د چنګاښ ۳۰ مه) له غرمې وروسته د افغانستان له ملي موزیم څخه لیدنه وکړه:« بریټانیا د افغانستان د تاریخي اثارو یو پياوړی ملاتړی هیواد دی له کلونو راهیسې بريټانیا له بېلا بېلو لارو د افغانستان له موزیم سره مرسته کړې ترڅو خپل تاریخي اثار وساتي.»
په همدې حال کې د ملي موزیم رییس محمد فهیم رحیمي د دغه موزیم د پراختیا او پرمختګ خبر ورکوي.
ښاغلي رحیمي زیاته کړه:«د افغانستان د ملي موزیم او همدارنګه په ولایتونو کې د نورو موزیمونو لپاره پراخ او انکشافي پلاونه په لاس کې لرو.»
دغه زار، خلک هم غواړي ملي موزیم پراخوالی پيداکړي او د ملي موزیم لیدونکي زیات شي.
د کابل اوسېدونکې مولوده توانا وايي:«کله چې یوه ټولنه د غني فرهنګي اثار ولري، ښې پایلې لري.»
د افغانستان ملي موزیم په کابل کې د هېواد د سترو تاریخي میراثونو او د اثارو د ساتنې مرکز دی چې پکې لږ تر لږه ۷۰ زره تاریخي اثار ساتل کېږي.
بلخوا د رپوټونو له مخې په هېواد کې ځينې تاریخي ځایونو کې په خپل سرې توګه کیندنې کېږي او بهرته په قاچاقي ډول لېږدول کېږي.