د افغان ولسمشر اقتصادي سلاکار اجمل احمدي وايي چې هغوی د اندونیزیا له لارې اسټرالیا ته د هېواد د توکو د ټرانزیټ لپاره بېلابېلې ټاکنې څېړي.
په مالي او بانکي چارو کې د ولسمشر سلاکار اجمل احمدي وایي، د ملي یووالي حکومت د هند، اندونیزیا، ترکیې او چین له لارو استرالیا ته د هوایي دهلیزونو پر جوړولو کار کوي او په دې برخه کې د هند ونډه ډېره مهمه ده.
ښاغلي احمدي په دې اړه وویل:«موږ انډونیزیا او له هغه ځایه اسټرالیا ته د توکو د ټرانیزیټ امکان څېړو. خو نورې تګلارې هم شته او زه فکر کوم چې کولای شو په دې برخه کې مبتکرانه عمل وکړو. نو پر دې اساس کهچېرې دا لار په هره بیه چې وي، کولای شو نور لېږدونکي موردونه په پام کې ونیسو. ممبيي یا کلکتې ته د هوا له لارې د توکو لېږد او له هغه ځایه وروسته له کېښتۍ سره یوه ټاکنه ده.»
په همدې حال کې یو شمېر اقتصادي کارپوهان د افغانستان او استرالیا ترمنځ د سوداګرۍ مخینې ته په کتو وایي، د افغانستان زعفران، غالۍ او وچې او تازه مېوې اوس هم په استرالیا کې مېنهوال لري.
د اسټرالیا په ملي پوهنتون کې پروفیسور وېلیام مالي په دې اړه وویل:«هند، افغانستان، اسټرالیا او اندونیزیا په خپل ځان په یوه متفاوته شرایطو کې وویني. مهمې موضوع ته رسېدنه چې د اقتصادي پراختیاوو همکارۍ چورلیز دی او د سوداګرۍ اسانتیاوې او د بروګراټیک خنډونو له منځه وړل دي.»
اوسمهال د افغانستان او استرالیا ترمنځ د سوداګرۍ حجم په کال کې نېږدې لس مېلیونه ډالرو ته رسېږي، چې وړه برخه یې استرالیا ته د غالیو او ګران بیه ډبرو صادرات دي.