د سوداګرۍ صنایعو وزارت دافغانستان اوپاکستان ترمنځ د ترانزټ د ستونزو د هوارۍ په موخه د دواړو هېوادونو ترمنځ د هوکړهلیکونو له لاسلیک کیدو خبر ورکوي.
د دغه وزارت ویاند، مسافر قوقندي وایي چې په اسلام اباد کې د دواړو هېوادونو د استازو ترمنځ ناسته کې پاکستانې لورې منلې چې د افغانستان په میوو او سبزیو به د ګمرکي تعرفې د کمولو ترڅنګ اجازه ورکړل شي تر څو دافغانستان مالوچې دغه هېواد ته صادرې شي.
ښاغلی قوقندي په دې اړه وايي:«دا ناسته د افغانستان او پاکستان استازو ترمنځ د ترانزیت او سوداګرۍ په برخه کې له لاسته راوړنو ډک وه، ځکه چې په دې ناسته کې هوکړه وشوه تر څو پاکستان د افغانستان تازه میوو او سبزیو تېر کال کې پورته شوې تعرفې بیا ښکته کړي.»
خو د کانونو او صنعت پانګونکو شورا مسوولین د پاکستان له لوري په ځلونو د ژمنو ماتولو په اساس د دغه هوکړه لیک عملی کیدو ته هیله من نه دي.
بلخوا د افغانستان او پاکستان ګډې سوداګرۍ خونې په اعلامیه کې راغلي دي چې پاکستاني چارواکو ژمنه کړې تر څو یوه اوونۍ کې به د دواړو هژوادنو ترمنځ د ترانزیټي ستونزو لویه برخه هواره شي.
خو د خصوصي برخې یو شمېر کار پوهان د پاکستان حکومت پر دغو ژمنو باور نه لري.
د کانونو، صنعت سوداګرۍ شورا رئيس، سبیر بشیري وايي:«که څه هم موږ ډېر باورمن نه یوو چې دا هوکړې به د پاکستان له خوا پليشي، خو که پلي شي، پرته له شکه چې د دواړو هېوادونو سوداګرو ته به ګټور ووسي.»
د خصوصي برخې استازي وایي، افغان حکومت باید له قوي دریځ څخه له پاکستان سره خبرې وکړي او د ترانیزیټي ستونزې په بنسټيزه توګه هوارې شي.