د ولسي جرګې د ټاکنو له ترسره کېدو نږدې دوه نیمې میاشتې تېرېږي. خو لا هم د ټولو ټاکنیزو حوزو د رایو پایلې اعلان شوې نه دي.
د ټاکنو خپلواک کمېسیون وايي چې د لا روڼتیا لپاره شونې ده چې د کابل د ولسي جرګې ټاکنو کابو نیمايي رایې له سره وشمېرل شي.
د تاکنو خپلواک کمېسیون د ویاند مرستیال دبیح الله سادات په دې اړه وویل:«شاوخوا ۳۰۰ محلونه دي چې هغه باید ټول محلونه تفتش شي، په هغه باید د ټاکنیزو شکایتونو کمېسیون کارکوونکي ناظر بنسټونه او د سیاسي ګوندونو استازي هم شتون ولري.»
د ټاکنیزو شکایتونو کمېسیون وايي، که د دې بنسټ له معیارونو سره د بیا شمېرنې بهیر ښه او روڼ نه وي نو خپل څارونکي به د څارنې په موخه ور ولېږي.
د تاکنیزو شکایتونو کمېسیون منشِ علي رضا روحاني وايي:«موږ د لازمو اسنادو او شواهدو د شتون په رڼا کې او د روڼتیا د ټینګښت د تضمین په رڼا کې د بیاشمېرنې په بهیر کې ګډون وکړو.»
خو د سیاسي ګوندونو او بهیرونو یو شمېر څارونکي سره راغونډ شوي او د تصویرونو په ښودلو سره د کابل رایو د بیا شمېرنې بهیر له درغلیو ډک بولي.
د حزب ناظر سیف الرحمان حبیبي:«له بده مرغه د ټاکنو کمېسیون پر هغو صندوقونو کې چې په کې هېڅ هم نه وو په دغو ګودامونو کې ورته د پایلو نوملړ جوړ شو او هم ورته قانوني بڼه ورکړل شوه او همدارنګه په ډېټابس کې یې هم ثبت کړه.»
د ولسي جرګې د ټاکنو مهالوېش پر بنسټ د ټاکنو خپلواک کمېسیون باید د لړم په نولسمه لومړنۍ او د لیندۍ پر نهه ویشتمه وروستۍ پایلې اعلام کړې وای، خو کمېسیون د دوه نیمو میاشتو په تېرېدو سره د ولسي جرګې ټاکنو د ټولو پایلو په اعلام نه دی بریالی شوی.