دا پنځمه ورځ ده چې په کندهار ولایت کي د ټاکنو سیمهيیز دفتر مخی ته د دغه ولایت د ولایتی شورا او د افغانستان د ستر ملي ایتلاف په نوم بهیر پلویانو اعتراضونه روان دي او د ټاکنو د سیمهيیز دفتر دروازه یې تړلي ده.
اعتراض کوونکي په راتلوونکو ټاکنو کي د رایی اچوني د پروسي د بایومټریک سیسټم او روڼتیا غوښتنه کوي.
اعتراض کوونکي نعمت الله په دې اړه وویل:«د ټاکنو خپلواک کمېسیون دفتر له څو ورځو راهیسې په مطلقه توګه تړلی دی. دا دفتر به تر هغې تړلی وي چې د خلکو او د ولایتي شورا مشروع غوښتنې پوره نه شي.»
بل معترض خدای نظر هم وايي:«دا چې موږ لیدلي چې یوه کس حتا لس پېژندپاڼې اخیستي، نو له دې امله موږ باید رایه ورکړو او هغه چا ته یې ورکړو چې غواړو یې.»
همدارنګه دغه اعتراض کوونکي وایي ترڅو چي د ټاکنو خپلواک کمېسیون له خوا د دوی غوښتني نه وي منل شوي، دوی به له خپلو اعتراضونو لاس په سر نه شي.
اعتراض کوونکي محمد اخلاص څرګنده کړه:«تر هغې چې خپل حق ته نه یوو رسېدلي دا غونډې به دوام ولري. حتا کهچېرې حکومت زموږ په وړاندې له ځواک هم کار واخلي، موږ به خپلو خوځښتونو ته دوام ورکړو ترڅو خپلو غوښتنو ته ورسېږو.»
که څه هم د کورنیو چارو وزارت له لوري امر شوی و چې په ولایتونو کی دا ډول اعتراضونه مات شي او د ټاکنیزو کمېسیونو دروازي دې پرانیزي، خو په کندهار ولایت کې دا اعتراضونه لا هم دوام لري او د یاد ولایت د امنیه قومندانۍ چارواکي وایي غواړي د مذاکراتو له لارې اعتراض کوونکي دې ته چمتو کړي تر د ټاکنو د کمېسیون دروازه پرانیزي.
د کندهار د امنیه قوماندانۍ ویاند ضیا دراني وویل:«موږ له ځواکه د کار اخیستو پر ځای د مذاکرې لاره غوره کړې ترڅو وکړای شو دا موضوع حل او د ټاکنو کمېسیون دفتر پرانیستل شي.»
دا په داسې حال کې ده چې د ځینو ګوندونو په وینا د هغوی پلویان په هرات او ننګرهار ولایتونو کې د امنیتي ځواکونو له خوا د ټاکنو کمېسیون دفترونو له مخې شړل شوي او د هغوی ځينې نور ټپي او په بندخونه کې دي، هغه تور چې د امنیتي ځواکونو لخوا رد شوی دی.