د ټاکنو خپلواک کمېسیون نن شنبې (د غبرګولي په ۱۱ مه) د ولسمشرۍ ټاکنو د رایې ورکولو مرکزونو نوملړ اعلان کړ.
د دغه کمېسیون د رییسې ولسمشرۍ ټاکنو لپاره ۵۳۸۳ مرکزونه تایید کړي دي چې له دې ډلې ۲۰۰۲ مرکزونه د امنیتي ګواښونو له امله تړلي دي چې ۴۰۶ مرکزونه یې په غزني ولایت کې دي.
د ټاکنو د خپلواک کمېسیون رییسه حوا علم نورستانۍ وايي:«زموږ ۵۳۸۳ مرکزونه دي. چې له دې ډلې ۲۰۰۲ مرکزونه د امنیتي بنسټونو له امله تړلي دي چې ۴۰۶ یې په غزني کې دي.»
خو پر ټاکنو څارونکي بنسټونه په ټاکنیزو چارو کې د دغه کمېسیون پر پڅ کار نېوکه کوي.
د فیفا بنسټ ویانده مروه امیني وايي:«د پخوانیو نوملړونو پر بنسټ دوی مخته تللي؛ هر مرکز چې نوملړ درلود، دوی بیاځلې هماغه مرکز اعلان کړی او هېڅ کوم بدلون نه دی راغلی دا په خپله د ټاکنو کمېسیون کې د ظرفیت نشتون ښيي چې په دغې اوږدې موده کې دوی ونه توانېدل چې یوازې د نوملیکنې لپاره زمینه برابره کړي.»
د قانون له مخې د رایې ورکوونکو په نوملیکنه کې باید د بایو مېټریک له دستګاوو کار واخیستل شي؛ خو د ټاکنو خپلواک کمېسیون اعلان کړی دی چې په دې بهیر کې به له ټکنالوژۍ کار وانخلي.
ټاکل شوې ده د ولسمشرۍ ټاکنې یو سلو پنځه دیرش مېلیونه ډالره لګښت ولري چې د نړیوالې ټولنې له لوري به ورکړل شي.