سپينې ماڼۍ د یوې خبرپاڼې له خپرولو سره ویلي چې ولسمشر ټرمپ، د ازبیکستان له ولسمشر شوکت میرضیایف سره د لیدنې په ترڅ کې له طالبانو غوښتي ترڅو له جګړې لاس واخلي او له افغانستان سره د سولې د خبرو اترو پر مېز کېني.
له ټرمپ سره د میرضیایف د لیدو یو له اصلي چورلیزونو څخه د افغانستان پر اوضاع خبرې وې. سپینه ماڼۍ وايي چې د ازبیکستان ولسمشر د ازبیکستان له لارې په افغانستان کې د امریکايي ځواکونو د اکمال بهیر دوام، په افغانستان کې د سولې او ټیګاو سره مرسته او په افغانستان کې د نشهيي توکو د قاچاق له مخنیوي ډاډ ورکړ.
د سپينې ماڼۍ په خبرپاڼه کې راغلي دي:«د ازبیکستان ولسمشر یو ځل بیا ټینګار وکړ چې طالبان دې له افغان حکومت سره له ځنډ پرته د خبرو اترو لپاره هوکړه وکړي. دواړو ولسمشرانو په افغانستان کې د امنیتي ځواکونو او ولسي وګړو پر وړاندې بزدلانه بریدونه وغندل او ژمنه یې وکړه ترڅو په افغانستان کې د ننګونو د حل لپاره ډېرې خبرې اترې وکړي.»
ټرمپ په دې اړه وویل:«موږ له یو بل سره له پوځي پلوه نیولې د ازبیکستان لخوا له امریکې د پوځي تجهیزاتو د پېرلو په ګډون، له یو بل سره همکاري لرو.»
کهڅه هم ازبیکستان د څو کلونو لپاره د روسیې سیاستونو تر نفوذ لاندې وه، خو واک ته د میرضیایف له رسېدو وروسته، تاشکند له نړۍ په ځانګړې توګه له لوېدیځ سره د تړلو دروازو د پرانیستو لپاره هڅې زیاتې کړې.
میرضیایف څرګنده کړه:«ښاغلی ولسمشره، په تېر یوهنیم کال کې موږ له نېږدې له امریکې سره د پانګونې په برخه کې همکاري کوو او موږ له امریکې ډېرې ټکنالوژۍ پېرلې دي. موږ وتوانېدو چې په دغه لیدنه کې د ۱۲ مېلیارده ډالرو په ارزښت تړونونه لاسلیک کړو.»
په همدې حال کې د ازبیکستان ولسمشر ژمنه وکړه چې تاشکند به د افغانستان د سولې له بهیر سره د مرستې په پار هڅې وکړي.
ازبیکستان په افغانستان کې د ثبات د رامنځته کې په چارو کې د مرستو له پرلهپسې ژمنو سره، په سیمه کې د ځایګي د ترلاسه کولو په لټه کې دی او یا هم د افغانستان په شمال کې له بدې امنیتي اوضاع څخه اندېښمن دی؟
تاشکند د روان کال د مارچ میاشت په وروستیو کې، د افغانستان په اړه د سولې د یوې نړیوالې غونډې کوربتوب وکړ او حتا ټینګار یې وکړ چې له طالبانو سره د خبرو اترو د پیل لپاره کوربتوب ته هم چمتووالی لري.