د افغانستان کرېکټ بورډ، د بنګلهدېش د کرېکټ ملي سره د درې ۲۰ اوریزو سیالیو وخت او ځای اعلان کړ.
ټاکل شوې ده چې د هېواد د کرېکټ ملي لوبډله، د بنګلهدېش له ملي لوبډلې سره درې ۲۰ اوریزې لوبې، د افغانستان په کوربهتوب د هند د دهرادون ښار په راجیوګاندي لوبغالي کې ترسره کړي.
د دغو سیالیو لومړی پړاو به د روان لمریز کال د غبرګولي په ۱۴ مه نېټه ترسره شي، دویمه او درېیمه لوبې به د غبرګولي په ۱۵ او ۱۷ کې ترسره شي.
د هېواد د کرېکټ ملي لوبډلې له بنګلهدېش سره تراوسه یوازې یوه لوبه په ۲۰۱۴ زیږدیز کال کې ترسره کړې ده چې لوبه د بنګلهډېش د ملي لوبډلې په ګټه پای ته رسېدلې وه.
دا په داسې حال کې ده چې د ۲۰ اوریزو سیالیو په نړیواله ډلبندۍ کې افغانستان اتم او بنګلهدېش ۱۰ ځای لري.
ټاکل شوې ده چې د دغو سیالیو له پای ته رسېدو وروسته، د هېواد د کرېکټ ملي لوبډله په خپله لومړنۍ ټیسټ لوبه کې د هند په وړاندې خپل بخت ازمايي.