دا لوبغالی هند په ۶۰۰ زره ډالرو، اتلس جریبه ځمکه باندې په ۱۶ میاشتو کې جوړ کړی او پرون رسماً پرانیستل شو.
د لوبغالي پرانیستې مراسمو ته د هند سفیر هم ورغلی و.
چارواکي د کرېکټ د دغه لوبغالي په پرانسته خوښ دي او هیله لري چې دغه لوبغالي کې نړیوالې لوبې هم وشي.
د کرېکټ دغه لوبغالی چې د رغولو چارې یې شپاړس میاشتې وړاندې پېل شوې وې د دوشنبې پر ورځ رسما پرانیستل شو.
د دغه لوبغالي مالي لګښت شپږ سوه اتلس زره ډالره دی چې د هند له لوري په اتلس جریبه ځمکه جوړشوی دی.
په افغانستان کې د هند سفیر منپریت ووهرا وویل:«زما هیله دا ده چې د کرېکټ دغه لوبغالی له هره اړخه په افغانستان کې تر ټولو په ښه لوبغالي بدل شي موږ د دغه لوبغالي د پراختیا لپاره ژمن یوو.»
اخوا د کندهار والي د هند د دې کار ستاینه کوي او هیله لري چې یوه ورځ په دې لوبغالي کې د نړۍ په کچه لوبې وشي.
د کندهار والي زلمي ویسا هم څرګنده کړه:«موږ ویاړو چې یو وخت د کرېکټ په دغه لوبغالي کې د نړیوالو سیالیو شاهد واوسو.»
په سوېل لویدېځ زون کې د کرېکټ بورډ مسوولین د هند د دې مرستې ستاینه کوي او وايي، د لوبغالي د پاتې برخو کار به هم بشپړ شي.
دا لومړی ځل دی چې په کندهار کې د کرېکټ لوی لوبغالی جوړېږي.
د کرېکټ د چارو شنوونکي وايي، د دغه لوبغالي په جوړېدو سره د سویل لویدېځ زون لوبغاړي د هېواد د کرېکټ ملي لوبډلې ته لاره پیدا کولی شي .