د امریکا متحده ایالاتو یو نوی رپوټ ښيي چې دغه هېواد له ۲۰۰۲زیږدیز کال څخه تراوسه څه باندې ۷۶ مېلیارد ډالر،د افغان امنیتي ځواکونو لپاره د وسلو، ارتباطي وسایلو او پوځي تجهیزاتو د برابرولو لپاره لګولي دي.
د دغه رپوټ پر بنسټ، په څه باندې یوې نيمې لسیزه کې، د امریکا متحده ایالاتو کابو ۶۰۰ زره وسلې افغان امنیتي او دفاعي ځواکونو ته ځانګړې کړې دي او له دې ډلې د دغو وسلو ۸۱ سلنه یې ټوپکونه او تومانچې دي.
په دغو پوځي وسایلو کې، څه باندې ۲۵ زره لاسي بمونه او کابو ۱۰ زره توغندي افغان سرحدي پولیسو ته ورکړل شوي هم شامل دي.