نن ګهیځ چادري کړیو بریدګرو د پاکستان په پېښور ښار کې پر یوه روزنیز مرکز برید کړی چې په پایله کې یې لږ تر لږه ۹ تنه وژل شوي او کابو ۴۰ تنه نور ټپيان شوي دي.
د رسنیو رپوټونه ښيي چې د وژل شويو په ډله کې د پېښور ښار د کرنې انسټېټیوټ ۸ زدهکړیالان او د دغه انسټېټیوټ یو مسوول د وژل شویو په ډله کې دي.
د پاکستاني طالبانو تحریک، د دغه برید پړه منلې ده.
د پاکستاني رسنیو د رپوټ پر بنسټ، بریدګرو ښځینه جامې اغوستې وې او ودانۍ ته له ننوتو سره جوخت په روزنیز مرکز یې ډژې وکړې.
د پاکستان امنیتي چارواکو ویلي دي چې ۴ بریدګر وژل شوي، خو د چاڼ عملیات دوام لري.