د سويلي کوریا ولسمشر، مون جي د شمالي کوریا له مشر کیم جونګ اون سره د لیدنې په پار پیونګ یانګ ته سفر کړی دی.
د سويلي او شمالي کوریاو د مشرانو د ناستې موخه د دواړو هېوادونو ترمنځ د اقتصادي اړیکو پراختیا او د شمالي کوریا د اټومي وسلو ختمول دي.
په همدې حال کې د دغو دوو مشرانو ناسته د سیول د اوسيدونکو له بيابيلو غبرګونونو سره مخامخ شوې ده.
د سويلي کوریا یو شمېر اوسيدونکو په سیول کې د دغې ناستې په غبرګون کې لاریون کړی وو.
اعتراض کوونکی، لی وونګ ګېل وايي:« دا به د خندا وړ وي که وویل شي کیم جونګ اون بدل شوی، ځکه چې هغه نه بدلېږي. د شمالي کوریا د اوسېدونکو د بشري حقونو له مسلې پرته، د دغه هېواد بې اټومي کولو ته پاملرنه بې مانا خبره ده.»
بل خوا د سیول یو شمېر اوسېدونکي دا ناسته د دواړو هېوادونو په ګته بولي.
سوداګر، جیونګ سونګ وايي:«د سوېلي کوریا د یوه اوسېدونکي په صفت، زه له دغې ناستې خوښ یم،
که څه هم تر دې وړاندې ترسره شویو ناستو د پام وړ پایلې نه درلودې، خو هیله من یم چې له دې وروسته د دواړو هېوادونو ترمنځ ښه کارونه ترسره شي.»
سرتېری، سونګ یونګ جي زیاتوي:« کله چې ولسمشر مون له پیونګ یانګ نه لیدنه کوي، هیله لرم چې کیم جونګ اون هم سیول ته سفر وکړي. که د دواړو کوریاګانو ترمنځ ناسته په ښه توګه ترسره شي، زه هیله من یم چې دواړه هېوادونه به متحد شي او اقتصادي اړیکې به یې پیاوړې شي.»
دا شمالي کوریا ته د سوېلي کوریا د ولسمشر لومړی سفر دی.
تر دې وړاندې د دغو هېوادونو مشرانو د شمالي او سوېلي کوریاګانو ترمنځ په سرحدي سیمو کې له یو بل سره لیدلي وو.
ټاکل شوې د سوېلي کوریا ولسمشر د پنجشنبې په ورځ خپل هېواد ته ستون شي.