د کابل مراد خانۍ سیمه د پلازمېنې له لرغونو سیمو ده چې لرغونتیا یې څه باندې درې سوه کاله ده.
د کابل په دې سیمه کې لا هم په پخوانۍ بڼه رغول شوي خټین کورونه او په ځانګړو نقاشیو جوړې دروازې او کړکۍ شته.
د رواياتو له مخې، لومړى ښوونځى چې په کابل کې پرانېستل شو په همدې سيمه کې و.
مرادخاني د کابل د زاړه ښار یوه بېلګه ده، خټين دېوالونه او لرګینې کړکۍ د کابل د درې سوه کاله پخوانۍ معمارۍ ښودنه کوي.
د مراد خانۍ کورونه سره نښتې او تنګې کوڅې یې په لرګینو چتونو پوښل شوې دي.
د مرادخانۍ د دویمې ناحیې د وکیلانو رییس، سردار علي و ویل: «دا سیمه درې سوه کاله لرغونتیا لري، پخوا پکې له پنځه سوو تر شپږ سوو کورونه ودان و، اوس یې کورونه کم شوي؛ سل یا یو نیم سل کورونه پاتې دي.»
د مرادخانۍ سیمې اوسېدونکی، علي رضا و ویل: «مرادخاني ورته ځکه وايي، چې علیمردان او مراد خاني وروڼه وو، دا سیمه د دغو دواړو وروڼو په نوم یادیږي.»
۷۵ کلن محمود چې د دې سیمې له پخوانیو اوسېدونکو دی او د خپل ژوند ډېر کلونه یې په دې سیمه کې تېر کړي دي، ددې سیمې په تړاو ډېرې کیسې لري.
د مرادخانۍ اوسېدونکی، محمود د طلوع نیوز خبریال ته و ویل: «په مرادخانۍ کې جوړې شوې کوڅې ډېرې یو بل ته نږدې دي، ځکه دوی د یو بل خپلوان و، یو قوم وو. پخوا چې به د سیمې مشران سهار له خوبه ویښېدل، د خپلو ګاونډیانو چې خپلوان یې و، احوال به یې اخیسته.»
د کابل په مرادخانۍ کوڅه کې د پښګرۍ هټۍ له لسګونو کلونو راهیسې فعالې دي.
پښ ګر، امین الله د طلوع نیوز خبریال ته و ویل: «له ښوونځي چې به رخصت شو، هټۍ ته به راغلو او له پلار سره به مو کار کاوه، کابو ۳۵ کاله کیږي چې د مرادخانۍ په دې بازار کې یو.»
د کابل مراد خاني په پخوا وختونو کې یو سوداګریز مرکز او د خوراکي توکو د زیرمه کولو ګودام وو.
دا سيمه د هېواد د نورو لرغونو سيمو په څېر د جګړو پر مهال ډېره زيانمنه شوې او ډېرې برخې يې ويجاړې شوې دي.
خو وروسته بيا د فيروز کوه د کلتوري موسسې له خوا چې يوه غير دولتي موسسه ده، ورغول شوه.
په دې اړه مو اندونه