د برېټانیا لومړي وزیر، بوریس جانسون نه یوازې په قطر بلکې په ټوله سیمه کې له ترهګرۍ سره پر مبارزې د ټینګار ترڅنګ وايي چې هېواد یې د کویټ او عربي هېوادونو ترمنځ له منځګړتوب ملاتړ کوي.
د برېټانیا د بهرنیو چارو وزیر جانسون زیاتوي:«ټول احساس کوي چې باید په سیمه کې له ترهګرۍ سره مبارزه وشي. نه یوازې پر قطر بلکې په سیمه کې زموږ ټولو ملګرو هېوادونو کې.»
ښاغلی جانسون د عربي هېوادونو ترمنځ پوځي نښتې ردوي.
ده وړاندې وویل:«د پوځي مداخلې امکان نشته. خلک له بندیزونو خوښ نه دي او موږ هیله لرو چې ستونزې کمې شي. موږ له خپلو کویټي ملګرو د ترهګرۍ تمویل په برخه کې له مبارزې ملاتړ کوو.»
په همدې حال کې د ترکیې ولسمشر پر قطر د عربي هېوادونو بندیزونه ناسم بولي او له دې هېواد یې ملاتړ کړی دی.
رجب طیب اردوغان وايي:«د قطر پر وړاندې تورونه شته دي، خو زموږ په آند دا بندیزونه او تورونه عادلانه نه دي. د ټولو نورو هېوادونو په شان باید د قطر حاکمیت ته هم درناوی وشي. که د وروڼو ترمنځ جګړه وشي نو بریالی به نه وي.»
په دې منځ کې روسیې ونډه لږه ده.
د روسیې ولسمشر، ولادمیر پوتین څرګندوي:«د قطر ناورین یوه سیمهييزه ستونزه ده چې کولی شي د سیمې پر اقتصاد، انرژۍ او امنیت اغېزه وکړي، خو ما په دې ناسته کې په دې اړه له چا سره خبرې نه دي کړي.»
اوسمهال سعودي عربستان، عربي اماراتو، بحرین او مصر خپلې اړیکې له قطر سره پرې کړې دي. د دې ترڅنګ په دې وروستیو کې جیبوتي، سومالیا او مالدیف ههم خپلې اړیکې له دې هېواد سره پرې کړې دي.
قطر له ترهګرۍ په ملاتړ تورن دی.